Փասադենայի՝ իրարից անջատ հայ համայնքները ապրիլի 24-ին Հայոց ցեղասպանության երկու տարբեր հիշատակի արարողություն կանեն, բացի այդ նրանք մրցակցում են Հիշատակի այգում ցեղասպանության զոհերի հուշարձանի կանգնեցման հարցում: Գրում է «Փասադենա Սթար-նյուզ» թերթը:
Փասադենայի «Հայ դատի» հանձնախումբը Հայոց ցեղասպանության հիշատակի արարողություն է կազմակերպել ապրիլի 24-ին ժամը 10:00-ին քաղաքային դահլիճում: Ճիշտ նույն ժամին, Փասադենայում հիմնված Հայ համայնքի կոալիցիան, որը նախորդ տարիներին հիշատակի արարողությունը անցկացնում էր էր այդ դահլիճում, այս անգամ կանցկացնի Հիշատակի այգում:
Քաղաքի պաշտոնյաներն ասում են, որ սա առաջին անգամ է, որ Հայոց ցեղասպանության երկու տարբեր արարողություններ են կազմակերպվում:
«Ցավալի է, որ երկու մրցակցող արարողություններ են լինելու: Հաշվի առնելով, թե արարողություններն ինչին են նվիրված՝ որպես դրսից մարդ ցավում եմ: Հույս ունեմ, որ կողմերը կհամախմբվեն և միահամուռ ուժերով կնշեն հիշատակի օրը», – ասել է քաղաքային խորհրդի անդամ Թերի Թորնեքը, – «Եթե հուշարձանի հետ կապված տարաձայնություններ կան, դա ավելի վատ է: Հույս ունեմ, որ համայնքը կհամախմբվի այս կարևոր հարցի շուրջ»:
Կարդացեք նաև
Քաղաքապետ Բիլ Բոգարդն ասել է, որ նախընտրելի է մեկ արարողությունը, քանի որ տարբեր արարողությունները կնվազեցնեն մարդկանց քանակը:
Փասադենայի «Հայ դատի» հանձնախմբի նախագահ Շողիկ Եփրեմյանն ասել է, որ իրենց կազմակերպությունն ամեն տարի քաղաքապետարանի առաջ էր նշում արարողությունը, բայց այս տարի որոշել են քաղաքային դահլիճում անցկացնել այն:
«Մենք ավելի մեծ համայնք ունենք», – ասել է նա:
ՀՀԿ-ի նախագահ Խաչիկ «Քրիս» Շահինյանն ասում է, որ իրենք են սկսել արարողությունները նշել քաղաքային դահլիճում և արդեն երեք տարի է այնտեղ էին նշում: «Սա շատ հիասթափեցնող է, մի բան է, որ չպետք է լիներ», – ասում է նա, – «Ես համոզված եմ, որ խումբը, որը մտադիր է այդպես անել, ընդօրինակել է մեր ավանդույթները: Սա կվնասի մեր նպատակներին և մեր համայնքին»:
Երկու կողմերը նաև վեճի մեջ են 1915թ. Հայոց ցեղասպանության զոհերի հուշարձան կանգնեցնելու ծրագրի շուրջ: Երկու կողմերն էլ իրենց գաղափարները ներկայացրել են քաղաքապետարանին և երկու կողմերն էլ պնդում են, որ վերջացնում են իրենց նախագծերը: Արվեստի քոլեջի ուսանող Քեթրին Մենարդը ընտրվել է ՓՀԴՀ-ի նախագիծը ստեղծելու համար, իսկ Վահրամ Հովակիմյանը՝ ՀՀԿ-ի նախագծի:
Պատրաստեց Հովհաննես ԻՇԽԱՆՅԱՆԸ
