Անցած շաբաթ Գլենդելի հրուշակեղենի խանութում տեղի ունեցած վթարից զոհված 55-ամյա հայազգի տղամարդու որդին ասում է, որ իր հայրը իսկական քաղաքացու օրինակ էր և հրաշալի ծնող: Հաղորդում է «Սի Բի Էս» առցանց հեռուստակայանը:
Ստեփան Վարդանյանը մահացել է հինգշաբթի օրը, երբ 71-ամյա Վանդա Վոնգի մեքենան մխրճվել էր «Oledina’s» հրուշակեղենի խանութի մեջ:
Վարդանյանը կանգնած էր վաճառասեղանի մոտ և սուրճ էր պատվիրում, երբ մեքենան հարվածեց նրան:
Զոհվածի տղան՝ Գևորգ Վարդանյանը, ասում է, որ իր ընտանիքը ցնցված էր, երբ ստացավ մահվան մասին լուրը.
Կարդացեք նաև
«Մի պահ դառնագին լացում էինք: Հաջորդ պահին բոլորս նայում էինք նրա նկարին ու ծիծաղում, որովհետև այդպիսին էր նա, միշտ ժպտում էր», – ասում է Գևորգը:
Գևորգը պատմում է, որ իր հայրը ժամագործ էր, որը երկար տարիներ աշխատել է ավիատիեզերքի արդյունաբերության ոլորտում: Նա իր չորս հոգանոց ընտանիքը 1997թ. տարել էր Ամերիկա՝ նրանց ավելի լավ կյանք պարգևելու համար:
Գևորգն այժմ սպասում է Վոնգի գործով ոստիկանության հետաքննության արդյունքներին: Վոնգը նախկինում դատապարտված չի եղել:
«Ով էլ լինի այդ անձը, ես համոզված եմ՝ նա չէր ուզում, որ նման բան տեղի ունենա, բայց մենք պետք է պարզենք ինչն էր պատճառը, ես սա այսպես չեմ կարող թողնել», – ասում է նա:
Ոստիկանությունից հայտնել են, որ հոգեկան խանգարումները, ոգելից խմիչքը կամ թմրանյութերը վթարի արդյունք չեն դիտարկվում:
Ոստիկանությունը ուսումնասիրում է ավտոմեքենան՝ պարզելու, թե արդյոք մեխանիկական անսարքությունը չէր վթարի պատճառը:
Պատրաստեց Հովհաննես ԻՇԽԱՆՅԱՆԸ
