Կենտրոն եւ Նորք-Մարաշ վարչական շրջանների ընդհանուր իրավասության դատարանում, դատավոր Մնացական Մարտիրոսյանի նախագահությամբ, այսօր, ժ.15-ին շարունակվեց Արմեն Խալոյանի դեմ հարուցված քրեական գործով դատական նիստը:
Դատական վիճաբանությունների փուլում այսօր մեղադրական ճառով հանդես եկավ մեղադրողը: Նա հիմնավոր համարեց նախաքննության ժամանակ ձեռք բերված ապացույցները, որոնք հաստատվել էին այս գործով տուժողներ Մերուժան Հակոբյանի, Հայկ Կարապետյանի, Ռաֆայել Սարգսյանի ցուցմունքներով:
Ըստ այդ ցուցմունքների՝ Արմեն Խալոյանին անցյալ տարվա. հոկտեմբերի 25-ին, ժամր 16.45-ի սահմաններում, Երևանի Նալբանդյան փողոցի թիվ 130 հասցեում գտնվող ՀՀ ոստիկանության վարչական շենքի ընդունարանում ՀՀ ոստիկանապետի մոտ ընդունելություն կազմակերպելու հարցի շուրջ վիճաբանել է ՀՀ ոստիկանության պետի խորհրդական Մերուժան Հակոբյանի հետ, որի ընթացքում կոպիտ կերպով խախտել է հասարակական կարգը, աղմկել է և հայհոյել, բռնություն գործադրել՝ ձեռքերով հարվածել է Մ. Հակոբյանին ու նրան պատճառել առողջության թեթև վնասի հատկանիշներ չպարունակող մարմնական վնասվածք:
Մեղադրողը նաեւ հայտնեց, որ ամբաստանյալի՝ դատարանում տված ցուցմունքները պատասխանատվությունից խուսափելու միտում ունեն: Մեղադրողը պահանջեց Ա. Խալոյանին դատապարտել 5,5 տարվա ազատազրկման եւ 30 հազար դրամ տուգանքի: Պաշտպանական ճառին պատրաստվելու համար Խալոյանի պաշտպան Ռոբերտ Ռեւազյանը խնդրեց 10 օր ժամանակ:
Կարդացեք նաև
Դատական նիստը նշանակվեց ապրիլի 16-ին:
Ի դեպ, պաշտպանական ճառի հետ կապված՝ ձեռնպահ ենք մնում հրապարակել այս գործով ուշագրավ մանրամասներ եւս: Դրանք կհրապարակվեն ճառից հետո:
Ռուզան ՄԻՆԱՍՅԱՆ
