Թուրքիայի Դիարբեքիր քաղաքի հայ համայնքը 98 տարվա մեջ առաջին անգամ հնչեցրել է Սուրբ Կիրակոս եկեղեցու զանգը` տոնելով Սուրբ Հարությունը, սակայն պատշաճ պատարագ չի կարողացել մատուցել` հոգեւորականի բացակայության պատճառով: Այդ մասին երեկ հաղորդել է թուրքական «Դողան» լրատվական գործակալությունը:
Նույն աղբյուրի փոխանցմամբ` Դիարբեքիրի հայկական եկեղեցին գրեթե մեկ դար չգործելուց հետո վերջերս է վերանորոգվել, ինչին հատկացվել է 3 միլիոն 200 հազար դոլար: Բրոնզե զանգը պատրաստվել է Ռուսաստանում:
Սուրբ Հարության պատարագ մատուցելու համար Դիարբեքիր հոգեւորականներ գործուղելու` տեղի հայ համայնքի դիմումին Պոլսո Հայոց պատրիարքարանը արձագանքել է, որ հոգեւորականը այնտեղ կարող է լինել միայն մեկ շաբաթից: Այդ իսկ պատճառով եկեղեցում պատարագ չի մատուցվել, թեեւ հայ համայնքը տոնը նշել է:
Hurriyet Daily News-ի փոխանցմամբ` երկրի քրիստոնյա համայնքների կողմից նշվող Սուրբ Հարության տոնի կապակցությամբ երեկ պաշտոնական հայտարարություններ են հրապարակել Թուրքիայի նախագահ Աբդուլա Գյուլը եւ վարչապետ Ռեջեփ Էրդողանը:
Կարդացեք նաև
«Հավատում ենք, որ խաղաղության եւ ապահովության մեջ համատեղ ապրելու մեր մշակույթը կգերիշխի, ինչպես եղել է անցյալում», – հայտարարել է, մասնավորապես, Էրդողանը:
«Ազատություն» ռադիոկայան
