Գողության գործով մեղադրվում են նաեւ չափահաս երկու եղբայրներ
Տավուշի մարզի Աչաջուր գյուղի բնակիչներ, եղբայրներ, 1990թ. ծնված Արմեն Բալասյանին եւ 1992թ. ծնված Կարապետ Բալասյանին մեղադրանք է առաջադրվել այն բանի համար, որ նրանք ուրիշի գույքը գաղտնի հափշտակելու նպատակով նախնական համաձայնության գալով միմյանց եւ համագյուղացի անչափահաս, 1995թ. ծնված Վ. Ա.-ի հետ, 2012թ. նոյեմբերի 10-ի գիշերվա ժամը 2-անց 30-ի սահմաններում պատուհանը բացելու միջոցով ապօրինի մուտք են գործել Աչաջուր գյուղի բնակիչ Կոլյա Ալիխանյանին պատկանող սեփական տուն եւ գողացել 2 հատ «Պանասոնիկ» ֆիրմայի արտադրության հեռուստացույց, փոշեկուլ եւ արդուկ: Այնուհետեւ դռները կոտրելու միջոցով նրանք մուտք են գործել այդ տան նկուղ եւ գողացել բենզասղոց, օղու թորման սարք, 2 հատ էլեկտրական հաստոցներ՝ Կ. Ալիխանյանին պատճառելով ընդհանուր առմամբ 435 հազար դրամի նյութական վնաս: Բացի այդ, անչափահաս Վ. Ա.-ին մեղադրանք է առաջադրվել նաեւ այն բանի համար, որ նա համագյուղացի Վահան Օհանյանի տան առաջին հարկի ջարդված պատուհանով միայնակ մուտք է գործել նրա տուն եւ գողացել 2 հատ պղնձյա կաթսաներ՝ պատճառելով 50 հազար դրամի նյութական վնաս:
Դրանից բացի, Վ. Ա.-ն մեղադրանք է առաջադրվել այն բանի համար, որ նա 2012թ. օգոստոսի վերջին միայնակ մուտք է գործել համագյուղացի Աստղիկ Գասպարյանի տան հետնամասում գտնվող նկուղ եւ այնտեղից գողացել 22 լ օղով լի ապակյա տարա՝ պատճառելով 40 հազար դրամի նյութական վնաս: Արմեն Բալասյանին մեղադրանք է առաջադրվել ՀՀ քրեական օրենսգրքի 177 հոդվածի 3-րդ մասի 1.1 կետով(«Գողություն, որ կատարվել է ապօրինի մուտք գործելով» եւ 165 հոդվածի 4-րդ մասով («Անչափահասին հանցանքի կատարմանը ներգրավելը»),Կարապետ Բալասյանին՝ 177 հոդվածի 3-րդ մասի 1.1 կետով, Վ. Ա.-ին ՝ 177 հոդվածի 2-րդ մասի 3-րդ կետով((«Գողություն, որ կատարվել է պահեստարան կամ շինություն ապօրինի մուտք գործելով) եւ 177 հոդվածի 3-րդ մասի 1.1 կետով: Արմեն եւ Կարապետ Բալասյանների նկատմամբ խափանման միջոց է ընտրվել չհեռանալու մասին ստորագրությունը, Վ. Ա.-ի հանդեպ՝ չափահասի հսկողությանը հանձնելը: Այս գործով դատական առաջին նիստը Տավուշի մարզի առաջին ատյանի դատարանի Իջեւանի նստավայրում նշանակված է ապրիլի 4-ին:
Ոսկան ՍԱՐԳՍՅԱՆ
