Գյուղի սահմաններից դուրս ճանաչման խնդիր ունեցող պարբերաթերթը քայլեր է անում` շտկելու իրավիճակը:
Այսուհետ Լոռու մարզի միակ գյուղական` «Մարգահովիտի Զորավիգ» պարբերաթերթի ստեղծման պատմության մասին հանրապետության բնակչությունը տեղեկություններ կարող է ստանալ նաեւ համացանցից:
Գյուղի սահմաններից դուրս ճանաչելիության խնդիր ունեցող պարբերաթերթի գլխավոր խմբագիր Հովհաննես Սարդարյանն (լուսանկարում) Aravot.am-ի հետ հարցազրույցում նշում է, որ գործունեության հինգ տարիներից հետո թերթը հանրապետության մասշտաբով ներկայացնելն անհրաժեշտություն էր դարձել:
«Քանի որ մեր հիմնական ընթերցողները գյուղի բնակիչներն ու վանաձորցիներն են, մտածեցինք, որ անհրաժեշտ է զբաղվել թերթի հանրաճանաչության խնդրով, եւ արդյունքում ստեղծվեց թերթի ստեղծման ու հետագա գործունեության մասին պատմող փաստավավերագրական ֆիլմ»,-ասում է Հովհաննես Սարդարյանը:
Նա հույս է հայտնում, որ մարգահովիտցի 6 բարերարների հովանավորությամբ ստեղծված «Մի թերթի պատմություն» ֆիլմը ճանապարհ կբացի այլ շահագրգիռ անձանց իրենց ներդրումն ունենալու թերթի հետագա զարգացման գործում:
«Հնարավոր է, որ ֆիլմը դիտելուց հետո լինեն շահագրգիռ մարդիկ, ովքեր մեզ հետ համագործակցեն, որպեսզի թերթը հանրահռչակվի, ընդլայնի իր տիրույթները, տպաքանակը ավելանա, բովանդակությունը, թեմատիկան ընդլայնվի»,-բացատրում է թերթի գլխավոր խմբագիրը` նկատելով, որ լրացուցիչ ֆինանսավորման պայմաններում հնարավոր կլինի աշխատակիցների թիվն ավելացնել ու այդկերպ խուսափել միօրինակ ոճից:
«Քանի որ մարգահովիտցիների «Զորավիգ» հայրենակցական հ/կ-ն կարողանում է թերթի տպագրման համար գումար հատկացնել տարվա մեջ ընդամենը չորս անգամ, ուստի մենք չունենք լրագրողներ, խմբագիրը միանձնյա է կատարում այդ ամենը: Սա միօրինակության է հանգեցնում. ես ինչքան էլ ձգտում եմ անաչառ լուսաբանել, այնուամենայնիվ, խուսափել միօրինակ ոճից գրեթե չի ստացվում, որովհետեւ մեկ հոգով լրատվամիջոց պահելը դժվար է»,-եզրափակում է Հովհաննես Սարդարյանը:
Անուշ ԲՈՒԼՂԱԴԱՐՅԱՆ
