«Եթե նախկինում օմբուդսմենին նշանակում էր ՀՀ նախագահը, ապա այժմ օմբուդսմենին նշանակում է ԱԺ-ի բավականին լուրջ մեծամասնությունը: Եվ եթե ինձնից դժգոհ լինելու կամ իմ աշխատանքը գնահատելու կարիք լինի, ըստ օրենքի, այն պետք է անի ԱԺ մեծամասնությունը, ԱԺ-ն: Ես արդեն տեսնում եմ, որ ՀՀԿ-ի առանձին գործիչներ որոշակի դժգոհություններ ունեն. մենք հարգանքով ենք մոտենում այդ գնահատականներին, բայց ունենք մեր բացատրություններն ու պնդումներն այդ գնահատականների հետ կապված»,- այսօր մամուլի ասուլիսում ասաց ՀՀ ՄԻՊ Կարեն Անդրեասյանը:
Լրագրողներից մեկի հարց-դիտարկմանը, որ ինքն ընկալվում է, որպես երկրորդ նախագահի «կադր», Կարեն Անդրեասյանն ասաց. «Եթե հարցին այդ տեսանկյունից նայենք, ապա, ես կոալիցիոն կադր եմ, որտեղ կա ՀՀԿ-ն, ՕԵԿ-ը եւ ԲՀԿ-ն: Ես առաջին իսկ օրն ասել եմ, որ շնորհակալ եմ իրենց ՝ այդ վստահության համար, բայցեւ՝ պարտական չեմ եւ պարտական չեմ եղել: Ես գնահատել եմ իրենց վստահությունը եւ անում եմ այն, ինչի համար իրենք ինձ ընտրել են եւ հուսամ, որ դրական գնահատական կլինի մի օր»:
Հիշեցնենք, որ ՄԻՊ-ի հասցեին վերջերս քննադատությամբ հանդես եկավ, մասնավորաբար, ՀՀԿ-ական պատգամավոր Գալուստ Սահակյանը՝ Ազատության հրապարակում Րաֆֆի Հովհաննիսյանի համար վրան տեղադրելու հետ կապված : «Հարկավոր է մի քիչ էլ ինքը՝ Մարդու իրավունքների պաշտպանը պարապի, հասկանա, թե ինչի մասին է խոսում եւ երբ է խոսում: Նրա գերխնդիրը այն է, որպեսզի օրենսդրության պահանջների հիմքով հնարավորինս աջակցի մեր հասարակությանը՝ լարվածությունը թուլացնելու, առավել մտերիմ միջավայր ստեղծելու համար: Է՜, հո կրակը չե՞նք ընկել, որ Մարդու իրավունքների պաշտպան ենք նշանակել, ինքն էլ իր բնավորության գծերը փորձում է հասարակությանն ընդհանրացնել»,- ասել էր Գալուստ Սահակյանը:
Ընդհանուր առմամբ, օմբուդսմենն արձանագրում է, որ եւ ոստիկանության, եւ ընդդիմության գործելակերպը խաղաղ հավաքների ժամանակ, բավականին քաղաքակիրթ է դարձել:
Նելլի ԳՐԻԳՈՐՅԱՆ
Կարդացեք նաև
