Երեւանի քաղաքապետարանում մարդու իրավունքների խախտումների մասին ՀՀ մարդու իրավունքների պաշտպանի 2012 թվականի զեկույցը, որը հրապարակվեց անցյալ շաբաթ եւ, ըստ էության, Երեւանի ավագանու ընտրությունների նախաշեմին, արժանացավ ՀՀԿ-ականների բուռն հակադարձմանը: Հիշեցնենք, որ զեկույցում արձանագրված են չարաշահումների եւ մարդու իրավունքների խախտումների բազմաթիվ դեպքեր:
Այսօր Aravot.am-ը Կարեն Անդրեասյանից հետաքրքրվեց՝ ինչո՞ւ զեկույցի այդ հատվածը հրապարակվեց հենց ավագանու ընտրություններից առաջ, միտում կա՞ր: «Զեկույցներ հրապարակելիս մենք միտումներ չունենք, այն իմաստով, որ դրանք քաղաքական միտումներ չեն: Մենք հրապարակել ենք որոշակի հերթականությամբ, փորձել էինք համակարգել ըստ ոլորտների: Տվյալ պարագայում արդարադատության համակարգից մինչեւ տեղական ինքնակառավարման մարմիններ»,- ասաց Կարեն Անդրեասյանը՝ հավելելով, որ իր կարծիքով, մեր երկրում երկու գլխավոր խնդիրներ կան՝ արդարադատության պակաս եւ սոցիալ-տնտեսական վիճակը՝ «հացի պակասը»:
Որքանով են իր զեկույցները քաղաքականացվում՝ ՄԻՊ-ն իր խնդիրը չի համարում:
«Քաղաքապետարանն արձագանքել է ավագանու մեկ անդամի խոսքով, որքանով ես եմ տեղյակ: ՀՀԿ-ական պատգամավորների արձագանքները ես այստեղ չեմ պատրաստվում մեկնաբանել, որովհետեւ դա մասնագիտական քննարկում չէ դեռ»,- ասաց Կարեն Անդրեասյանը՝ հավելելով, որ ԱԺ նախագահի հետ պայմանավորվածություն կա իր զեկույցն ԱԺ առաջիկա քառօրյայում հնչեցնելու եւ թե ՀՀԿ-ական, թե ընդդիմադիր պատգամավորներն այտեղ հնարավորություն կունենան քննարկելու, քննադատելու, խորհուրդներ տալու եւ նույնիսկ գովաբանելու՝ եթե նման առիթ կգտնեն:
Քաղաքապետարանի արձագանքի մասով էլ ասաց. «Եթե իրենք կասկածում են, որ օրինակ, գանձվել են գումարներ կադաստրային արժեքի անվան տակ՝ այն դեպքում, երբ դա չպետք է լիներ, եթե իրենք կասկածում են, որ կա թափանցիկության եւ միատեսակ մոտեցման խնդիր՝ կրպակների եւ, ասենք, ավտոտնակների ու մնացած դեպքերում, ես պատրաստ եմ անուն առ անուն, գործ առ գործ ներկայացնել»:
ՄԻՊ-ը միայն մեկ դիմումատուից թույլտվություն ուներ իր անունը եւ իր գործը՝ որպես փաստ հրապարակելու: Դա Վանիկ Առաքելյանն է, ում քաղաքապետարանը ստիպել է ապօրինի գումարներ վճարել:
Նելլի ԳՐԻԳՈՐՅԱՆ
