Մենք ազգային ավիափոխադրող չունենք: Այսօր լրագրողների հետ զրույցի ժամանակ քաղաքացիական ավիացիայի գլխավոր վարչության պետ Արտյոմ Մովսիսյանն ասաց, որ մեր օրենքում նման` ազգային ավիափոխադրող սահմանում գոյություն չունի եւ անհասկանալի է, թե ինչպես է այդ արտահայտությունը`«Արմավիան» որպես ազգային փոխադրող, շրջանառության մեջ մտել:
Լրագրողների այն դիտարկմանը, որ «Արմավիա» ավիաընկերության գովազդում է ասվել, ավիաընկերությունն ինքն էլ բազմիցս շեշտել է, որ իրենց՝ որպես ազգային ավիափոխադրող, կառավարությունը արտոնություններ չի տալիս, պարոն Մովսիսյանն ասաց, որ մինչ օրս կառավարությունն իր բոլոր պարտականությունները «Արմավիայի» հանդեպ, կատարել է եւ շարունակում է կատարել. «Արմավիային» մենք տվել ենք բացառիկության իրավունք, մենք տվել ենք բոլոր ուղղություններով թռիչքներ իրականացնելու իրավունք, մենք տվել ենք ցանկացած ազատ թռիչք առաջանալու ժամանակ առաջին մերժման իրավունք, ինքը պետք է հրաժարվի, նոր մեկ ուրիշին առաջարկենք»:
Լրագրողների այն հարցին՝ ի՞նչն է պատճառը, որ արդեն 3 շաբաթ է «Արմավիան» դեպի Բեյրութ թռիչք չի իրականացնում, քաղավիացիայի գլխավոր վարչության պետն ասաց, որ Բեյրույթի ավիացիան ցանկություն է հայտնել «Արմավիայում» աուդիտ իրականացնել, ինչին էլ ՀՀ քաղավիացիան համաձայնություն է տվել:
Նելլի ԲԱԲԱՅԱՆ
