Մանդելայի մոտ կրկնվել է թոքային վարակը
Հարավային Աֆրիկայի նախկին նախագահ Նելսոն Մանդելան այս ամսվա ընթացքում արդեն երկրորդ անգամ է տեղափոխվել հիվանդանոց՝ այս անգամ թոքային վարակի պատճառով:
Երկրի պաշտոնյաների համաձայն, Մանդելան «լավ ձեռքերում» է, սակայն ռասայական խտրականության դեմ պայքարի հանրահայտ 94-ամյա գործչին հիվանդանոց տեղափոխելն անհանգստացրել է շատերին:
Հարավային Աֆրիկայի նախագահի խոսնակ ՄաքՄահարաջը հորդորել է երկրի բնակիչներին «աղոթել նախկին նախագահ Նելսոն Մանդելայի առողջության համար»:
Կարդացեք նաև
Մանդելան ընդամենը 20 օր առաջ էր դուրս գրվել հիվանդանոցից, որտեղ նրան տրվել է «կանոնավոր բժշկական զննում»:
Նա, բացի այդ, անցյալ տարվա դեկտեմբերին 18 օր անց է կացրել հիվանդանոցում՝ բուժվելով թոքային վարակից և լեղապարկի քարերից: Դրանից առաջ Մանդելան Յոհանեսբուրգի հիվանդանոց էր ընդունվել 2011 թվականին՝ շնչուղիների սուր վարակի պատճառով:
Հարավային Աֆրիկայի նախկին նախագահի մոտ 1988 թվականին պալարախտ է հայտնաբերվել: Այս հիվանդությունը դարձել էր Մանդելայի 27-ամյա բանտարկության հետևանքներից մեկը:
«Ամերիկայի Ձայն»
