Մարտի 19-ին կայացավ Հայաստանի կինեմատոգրաֆիստների միության 11-րդ համագումարը, եւ ձայների մեծամասնությամբ երրորդ անգամ նախագահ վերընտրվեց Ռուբեն Գևորգյանցը, որը կառույցը ղեկավարում է 2003 թվականից: Ի դեպ, շուրջ 10 տարի կառույցը ղեկավարած կինոմիության նախագահը համագումարին խոստովանել էր , որ ամեն ինչ այնքան էլ վարդագույն չէ եւ իրենք պայքարում ու հաղթահարում են դժվարությունները վայրի կապիտալիզմի պայմաններում:
Aravot.am-ի հարցին, թե ինչո՞ւ հապշտապ եւ համարյա գաղտնի հրավիրվեց համագումարը, պարոն Գեւորգյանցը չցանկացավ պատասխանել՝ պատճառաբանելով զբաղվածությունը: Ավելի ուշ մեր հարցերին խոստացավ վաղը պատասխանել:
Որոշ ռեժիսորներ չէին մասնակցել կինեմատոգրաֆիստների միության համագումարին: Նրանց թվում է շնորհալի ռեժիսոր Էդգար Բաղդասարյանը: Aravot.am-ը պարոն Բաղդասարյանից հետաքրքրվեց պատճառը: Ռեժիսորն ասաց, որ ուղղակի մոռացել էր համագումարի օրվա մասին. «Ես անկեղծ մոռացել էի, հետո իմացա, որ այդ օրն էր»:
Նա նեղսրտեց. «Ասում են սուսուփուս է անցել, ելույթներ չեն եղել, դա նորմա՞լ բան է: Մենք ոչ Տաջիկստան ենք, ոչ էլ Թուրքմենիա, այդ ամենը անհասկանալի է ինձ համար»:
Կարդացեք նաև
Հարցրինք՝ ինչպե՞ս է վերաբերվում այն փաստին, որ նախագահը արդեն երրորդ անգամ է վերընտրվում: «Ոնց կարող եմ վերաբերվել, հո չի՞ կեղծվել, ընտրել են: Ես էնտեղ չեմ եղել, չեմ լսել՝ ով ինչ ելույթ է ունեցել»,-ասաց մեր զրուցակիցը:
Իսկ իբրեւ կինոմիության անդամ, գո՞հ է այդ կառույցի գործունեությունից, աշխատանքից: «Կարծում եմ, որ միշտ կարելի է փոխել ինչ-որ բան, բայց փոխել՝ ինչի՞ հետ, ամենակարեւոր հարցը դա է: Փոխել ինչը՝ ինչո՞վ: Կուզենայի, որ միությունն ավելի ակտիվ եւ ավելի անկախ լիներ ու պաշտպաներ անդամներին՝ որպես պրոֆմիություն: Այդ առումով այնքան էլ գոհ չեմ՝ լիքը աշխատելու տեղ կա: Կուզենայի, որ ռեժիսորների ֆիլմերը, որ հաճախ դուրս չեն գալիս տարբեր պատճառներով՝ քաղաքական կամ այլ, պաշտպանված լինեին միության կողմից: Միության խնդիրն է պաշտպանել հեղինակի իրավունքները, ազատ խոսքի եւ ազատ արտահայտվելու իրավունքը: Ցավոք, այդ բանը չկա մեզ մոտ: Միության առաջնահերթ ինդիրը դա է, ինքը նախեւառաջ պրոֆմիություն է, հետո են գալիս մնացած հարցերը: Շաքար եւ կոնսերվա բաժանելը, իհարկե, շատ լավ բան է, բայց նախ ռեժիսորի իրավունքները պետք է պաշտպանել»,- նշեց Էդգար Բաղդասարյանը:
Իսկ ի՞նչ օգուտ է տվել կինոմիությունը կոնկրետ իրեն՝ որպես ռեժիսոր, օրինակ, երբեւէ պրոպագանդե՞լ է իր ֆիլմերը: «Ինձ ոչ ոք ոչ մի անգամ չի պրոպագանդել, ոչ միությունը, ոչ էլ մյուսը: Բայց կա տեղ, որ կինոմիության տոմսն ինձ օգնում է: Որ գնում եմ «Մոսֆիլմ»՝ առանց անցաթղթի, միայն միության տոմսով կարողանում եմ ներս մտնել»,-ասաց ռեժիսորը:
Գոհար ՀԱԿՈԲՅԱՆ
