«Առանձնասենյակում նստելն եւ շատ սիրուն որոշումներ ընդունելը կարող է ի վերջո իրատեսական չլինել եւ բացասական հետեւանքներ ունենալ»,-ասում է հոգեբանական գիտությունների դոկտոր, պրոֆեսոր Հրանտ Ավանեսյանը՝ նշելով, որ պետական կառավարման մարմինները վերջին տարիներին սկսել են հետաքրքրվել կառավարման հոգեբանությամբ:
Նրա խոսքով՝ հոգեբանական հարցերը մեր այժմյան կառավարման համակարգում նույնպես արդիական են, քանի որ վերաբերում են որոշումների կայացման եւ իրագործման խնդիրներին, կադրային քաղաքականությանը, ինչպես նաեւ աշխատակիցների միջեւ փոխհարաբերություններին:
«Այսօրվա ցանկացած կառավարիչ՝ անկախ նրանից՝ ինչպիսի պաշտոն է զբաղեցնում , պետք է իմանա՝ իր բոլոր գործառույթները անդրադառնո՞ւմ են ողջ հասարակության վրա»,- նշում է պրոֆեսորը՝ ընգծելով, որ կառավարման հոգեբանության մեջ շատ կարեւոր է նաեւ հետադարձ կապը, այսինքն՝ եթե կառավարող մարմինը ինչ-որ որոշում է կայացնում, պետք է նաեւ ուշադրությամբ հետեւի հասարակության արձագանքին:
Հոգեբանական գիտությունների թեկնածու, դոցենտ Ռուբեն Աղուզումցյանի համոզմամբ՝ զարգացած երկրներում առաջնային են համարվում մարդը եւ մարդկային ռեսուրսները, եւ կառավարման հոգեբանության մեջ նույնպես կարեւոր գործոն է հանդիսնում նախեւառաջ մարդը:
Կարդացեք նաև
«Անկախ տեխնիկայի զարգացվածության աստիճանից, անկախ նրանից՝ ինչքան հարուստ է պետությունը, ամեն ինչ որոշվում է մարդու կողմից: Եթե պետությունն ուղղված է լինում դեպի մարդը, ապա՝ այդ դեպքում լինում է դրական տեղաշարժ»,- նշում է ՀՀ հոգեբանների ասոցիացիայի նախագահը:
Aravot.am-ը հոգեբաններից հետաքրքրվեց, թե մեր կառավարության կողմից կայացված որոշումները որքանո՞վ են համապատասխանում հոգեբանների կողմից նշված կառավարման հոգեբանության չափանիշներին:
Հոգեբանական գիտությունների դոկտոր Հրանտ Ավանեսյանը պատասխանեց.
«Նախ մեր կառավարության կողմից չի իրականացվում հարցի նախնական հետազոտություն , եւ հետո հասարակությանը հոգեբանական մեթոդների միջոցով պետք է պատրաստել տվյալ որոշումը ընդունելու եւ պատշաճ ձեւով ընկալելու համար»: Որպես իր ասածների ապացույց՝ հոգեբանը նշում է տաքսիներին վերաբերվող կառավարության կողմից առաջարկված օրենսդրական նախաձեռնությունը, որը տաքսիստների շրջանում մեծ բողոք էր բարձրացրել:
Հոգեբանական գիտությունների թեկնածու, դոցենտ Ռուբեն Աղուզումցյանը կարծում է, որ ամեն մի համակարգ իր յուրահատկությունն ունի:
«Սովետական համակարգի դրական կողմերը կարելի է վերցնել, օգտագործել: Կան բաներ, որոնք անհնար է այսօր օգտագործել: Իսկ մարդիկ դեռ հին ձեւով են մտածում: Շատ հաճախ ղեկավարներից ոչ թե պահանջվում է ուղղվածությունը դեպի մարդը, այլ՝ ամեն գնով արդյունքի հասնելը: Ախր մեր ղեկավարները չգիտեն, որ մարդն է կարեւոր»:
Աշոտ ԱԹԱՅԱՆ
