«Եթե Րաֆֆի Հովհաննիսյանը չկարողանա իր ճանապարհով շարժումը հաղթանակի բերել, դա չի նշանակում, որ շարժումը մարեց: Այս դեպքում կփոխվեն միայն առաջնորդների անունները»,- այսօր «Իրատես de facto» ակումբում ասաց «Սարդարապատ» շարժման նախաձեռնող խմբի անդամ Տիգրան Խզմալյանը:
Հարցին, թե արդյոք ինքը տեսնում է շարժման հաղթանակի նախադրյալներ, պատասխանեց, որ ոչ միայն տեսնում է, այլեւ այդ գործընթացներին մասնակցում է. «Շարժման հաղթանակը եւ Սերժ Սարգսյանի պարտությունը անխուսափելի է»:
Անդրադառնալով առաջիկա զարգացումներին եւ ապրիլի 9-ին նախատեսված Սերժ Սարգսյանի երդմնակալությանը, ասաց, որ ոչ մի էական փոփոխություն չի կարող լինել երդմնակալությունից հետո, որովհետեւ էական փոփոխություններն արդեն կատարվել են. «Հայաստանը փոխվել է, չկա այլեւս վախ եւ հարգանք իշխանության հանդեպ: Փոխարենը կա մինչ հատակը հասած օտարացում իշխանությունների նկատմամբ: Ինչ էլ լինի ապրիլի 9-ին, դրանից հետո ոչ մի հարց չի լուծվելու»:
Պարոն Խզմալյանը նաեւ ասաց, որ հույս ունի, թե Րաֆֆի Հովհաննիսյանը առաջիկայում ավելի համակարգված կսկսի գործել: Հարցին, թե ի՞նչ նկատի ունի համակարգված ասելով եւ արդյոք մինչեւ հիմա նրա քայլերը ոչ համակարգված է համարում, պարոն Խզմալյանը պատասխանեց. «Նրա քայլերն ունեն ներքին տրամաբանություն, ինչը տարօրինակ է մեզ համար: Նա վերջին 20 տարվա մեջ առաջինն է՝ որպես քաղաքական գործիչ, որը փորձեց եւ իրեն հաջողվում է, կամրջել վիհը ժողովրդի եւ իշխանության միջեւ, իր բարեւելով ու զոհաբերության պատրաստակամությամբ վերացնում է օտարացումը իշխանությունների նկատմամբ»:
Կարդացեք նաև
Արփինե ՍԻՄՈՆՅԱՆ
