Լոնդոնում ընթացող շախմատի հավակնորդների մրցաշարի ավարտին մնում է ընդամենը չորս տուր:
Մրցաշարում ըստ էության հայտնի են դարձել այն երեք շախմատիստները, որոնցից մեկը կտիրանա աշխարհի գործող չեմպիոն Վիշվանաթան Անանդի հետ շախմատային թագը վիճարկելու ուղեգրին: Նրանք ՖԻԴԵ-ի վարկանիշային դասակարգման ցուցակի առաջին եռյակը կազմող գրոսմայստերներն են՝ Մագնուս Կարլսենը՝ 7,0 միավոր, Լեւոն Արոնյանը՝ 6,5 եւ Վլադիմիր Կրամնիկը՝ 6,0: Վերջինը 10-րդ տուրից հետո մոտակա երեք մրցակիցներին՝ Պյոտր Սվիդլերին, Ալեքսանդր Գրիշչուկին եւ Բորիս Գելֆանդին, գերազանցում է արդեն 1,5 միավորով:
Ինչպե՞ս կզարգանան իրաարձություններն առաջիկա տուրերում: Իհարկե, հաջողության հասնելու համար Արոնյանից պահանջվում է տանել հնարավորին չափ շատ հաղթանակներ: Սակայն վերջնական արդյունքի հասնելու համար պետք է առաջատարը՝ Կարլսենը, գոնե մեկ անգամ սայթաքի: Նույնն ակնկալում ենք նաեւ Կրամնիկից:
Արոնյանը երեկ շատ կարեւոր հաղթանակ տարավ Վասիլի Իվանչուկի նկատմամբ: Եվ հետաքրքիր այն է, որ ուկրաինացին այս մրցաշարում երկրորդ անգամ Արոնյանի հետ պարտիայում սպառեց ժամանակը:
Այսօր՝ 11-րդ տուրում, հանդիպում են Սվիդլեր-Արոնյան, Իվանչուկ-Գելֆանդ, Կրամնիկ-Ռաջաբով, Գրիշչուկ-Կարլսեն զույգերը:
Աշոտ ՀԱԿՈԲՅԱՆ
