Թե ինչու դեղին համարանիշները կպչուն ժապավեններով փոխարինելու կառավարության նախաձեռնության դեմ բողոքող տաքսիստների հետ առանց զրուցելու ԲՀԿ-ական պատգամավորներն այսօր հեռացան, ԲՀԿ-ական պատգամավոր Վահան Բաբայանը Aravot.am-ի հետ զրույցում պարզաբանեց. «Քանի որ արդեն տեղի էր ունեցել նախարարի հանդիպումը կազմակերպիչների հետ, նպատակահարմար չգտանք նման ֆորմատով հանդիպման մասնակցել: Հետագայում այլ ֆորմատներով, եթե հարկ լինի, կհանդիպենք»:
Հիշեցնենք, որ բողոքող տաքսիստների հետ հանդիպման էր եկել տրանսպորտի եւ կապի նախարար Գագիկ Բեգլարյանը: Եվ ԲՀԿ-ականների լուռ հեռանալու առիթով էլ, նախարարը իր զարմանքն էր հայտնել: «Ինչո՞ւ չմոտեցան, մի հատ բարեւեն» -հարցրել էր նախարարը եւ «գովել» նրանց էթիկան. «Տեսնում եք`ինչ էթիկայի շրջանակներում են գործում»:
Ի պատասխան «գովասանքի»՝ պարոն Բաբայանը պատասխանեց. «Չցանկացանք միջամտել այդ հանդիպմանը: Առերեսվելու կամ չառերսեվելու խնդիր չունենք, ուղղակի հակառակն ասեմ՝ էթիկայի կանոններից ելնելով, երբ նախարարը հարցազրույցներ էր տալիս, որոշեցինք չմիջամտել»:
Պարոն Բաբայանի կարծիքով, կառավարության նախաձեռնությունը էական փոփոխություններ է ոլորտում նախատեսել. «Այս հարցը դեռ շատ է քննարկվելու, եւ այս հարցի շուրջ շահագրգիռ բոլոր կողմերի հետ քննարկումներ պետք է անել»:
Կարդացեք նաև
Մեր հարցին, ինչու կառավարությունը ավելի վաղ պարտադրեց դեղին համարանիշները ու վերջին փոփոխություններով այսքան խնդիրներ առաջացրեց, պարոն Բաբայանն ասաց. «Չեմ կարող ասել: Բավարարվենք այսքանով»:
Արփինե ՍԻՄՈՆՅԱՆ
