Այս տարի մրցույթին մասնակցում է 39.500 երեխա
«Արդեն 5-րդ անգամ անցկացվող «Կենգուրու 2013» միջազգային մրցույթն այս տարի աննախադեպ ցուցանիշներ է գրանցել: Արդեն մասնակցության համար գրանցվել է 39.500 երեխա եւ 960 դպրոց, որից 39-ը` Արցախից (1500 երեխա): Արձակուրդների երկարաձգման հետ կապված` մրցույթը տեղի կունենա ապրիլի 4-ին` դպրոցներում կազմակերպչական գործողություններն ապահովելու համար»,-այսօր ՀՀ կրթության եւ գիտության նախարարությունում լրագրողներին հայտնեց «Այբ» կրթական հիմնադրամի տնօրեն Դավիթ Սահակյանը:
Նա արձանագրեց, որ «Կենգուրուի» հաղթողները մինչ օրս հիմնականում մարզերից են. «Միայն մեկ անգամ` 2010թ-ին, հաղթողը Երևանից է եղել: Ընդհանուր առմամբ` տարեկան մոտ 1500 երեխա մրցանակ է ստանում: Լինում ենք դեպքեր, երբ բացահայտում ենք, որ երեխայի ցուցաբերած արդյունքն իրականում իրենը չէ, եւ նրան հաղթող չենք համարում: Բացի այդ, անցած տարի մրցույթի կարգը խախտելու հետեւանքով «կարմիր քարտ» է ստացել 9 դպրոց, որոնք մեկ տարի չեն մասնակցի մրցույթին»:
Սահակյանը փաստեց, որ առաջին տարում մասնակից-երեխաների թիվը գերազանցեց 30.000-ը, ինչն աշխարհում աննախադեպ ցուցանիշ է, իսկ նախորդ տարի մրցույթին մասնակցեց 39.100 երեխա:
Կարդացեք նաև
ՀՀ ԿԳՆ հանրակրթության վարչության պետ Նարինե Հովհաննիսյանը նշեց, որ կրթական որակի բարձրացման ուղղությամբ կատարվում են կադրային աշխատանքներ եւ տարբեր ռազմավարական ծրագրեր: Տիկին Հովհաննիսյանն ասաց, որ նախարարությունը կարեւորում է առարկայական օլիմպիադաների անցկացումը. «Արդեն կազմակերպվում են 16 առարկայական օլիմպիադաներ, որոնցից 6-ը միջազգային օլիմպիադային նախապատրաստվելու հնարավորություն են տալիս: Նախորդ ուսումնական տարում ունեցանք 16 մեդալակիր, համոզված ենք, որ այս տարի նրանց թիվն ավելանալու է»:
Լուիզա ՍՈՒՔԻԱՍՅԱՆ
