Բարեբախտաբար, պատմությունը հաջող ավարտ ունեցավ
Ազատության հրապարակում քիչ առաջ մի երեխա էր կորել: Երեխան հուսահատության մեջ էր: Նրան ոստիկանները բերեցին Րաֆֆի Հովհաննիսյանի եւ տիկին Արմենուհու մոտ:
Այդ ընթացքում քաղաքացիական բաց խորհրդի նիստն էր եւ Լեւոն Բաղրամյանը միկրոֆոնով հաղորդեց՝ Անուշ եւ Գուրգեն, մոտեցեք հրապարակի հարթակ, ձեր երեխան այստեղ է: Սակայն ոչ մի արձագանք չեղավ:
Կարդացեք նաև
Ի վերջո տիկին Արմենուհին վերցրեց երեխայի ձեռքը եւ սկսեց, այսպես ասած, անձնական որոնումները՝ զանգելով, ծնողների, հարազատների անունները ճշտելով:
Բարեբախտաբար պարզվեց, որ երեխան «Օրրանից» էր, ուստի տիկին Արմենուհուն հաջողվեց ճշտել երեխայի՝ Մերի Ներսեսյանի տատիկի հեռախոսահամարը:
Մերին Ազատության հրապարակ էր եկել իր քույր եւ եղբոր հետ, ոգեւորվել էր Հայաստան-Չեխիա ֆուտբոլային խաղի համար հայ երիտասարդ ակտիվիստների ոգեւորության ակցիայով եւ կորել:
Մինչ Արմենուհի Հովհաննիսյանը կզանգեր Մերիի տատիկին, մոտեցան երեխայի քույր եւ եղբայրը: Նրանք տագնապած էին եւ սկսեցին ուրախությունից լացել:
Հռիփսիմե ՋԵԲԵՋՅԱՆ
