«Ունիսոն» հասարակական կազմակերպության նախագահ Արմեն Ալավերդյանն ասում է, որ նախագահական ընտրություններից առաջ ու ընտրության օրը Երեւան քաղաքի բոլոր ընտրատեղամասերում իրենց կազմակերպության կողմից անցկացված դիտարկումների արդյունքում պարզ է դարձել, որ մայրաքաղաքի ընտրատեղամասերից միայն 31-ն են լիովին մատչելի եղել հաշմանդամություն ունեցող անձանց համար: Ինչպես նշում է «Ունիսոն» հ/կ նախագահը, տեղաշարժման հետ խնդիրներ ունեցող անձանց համար մատչելի ընտրատեղամասերը կազմում են մայրաքաղաքի ամբողջ տեղամասերի միայն 6 տոկոսը:
«44-ը հիմնականում մատչելի են, որոնք շուրջ 9-ը տոկոս են կազմում, այսինքն՝ նշանակում է, որ առանց օգնության դժվար է այնտեղ մտնել: Կան թեքահարթակներ, որոնք չեն համապատասխանում նորմերին»,-նշում է Ա. Ալավերդյանը՝ հավելելով, որ իրենց կազմակերպության կողմից փոխքաղաքապետին ուղարկված առաջարկությունների փաթեթում մանրամասն նշված է, թե ինչպես պետք է թեքահարթակներ սարքել հաշմանդամություն ունեցող անձանց համար անմատչելի 38 ընտրատեղամասերում:
Կազմակերպության նախագահը հատկապես կարեւորում է Երեւան քաղաքի հին շենքերում հաճախ բացակայող թեքահարթակների առկայությունը, իսկ նորակառույցներում՝ հարթ մուտքերի:
«Աշխարհն առանց արգելքների» հ/կ նախագահ, ԱԺ պատգամավորի օգնական Արման Մուշեղյանը կարծում է, որ հաշմանդամություն ունեցող անձանց խնդիրներն ավելի արագ կլուծվեին, եթե նրանք ավելի շատ ներգրավված լինեին գործադիր ու օրենսդիր մարմիններում: Նա նաեւ կարեւորում է հաշմանդամություն ունեցող անձանց մասնակցությունը որպես ընտրողների:
Կարդացեք նաև
«Ես ինքս Աբովյան քաղաքից եմ, եւ մեր ընտրատեղամասը հարամարեցված չէ հաշմանդամություն ունեցող անձանց համար, բայց ես միշտ գնում եմ ընտրության»,-նշում է Աժ պատգամավորը:
Նշենք, որ Երեւան քաղաքում հասարակական տրանսպորտի անմատչելիությունը շարունակում է մնալ հաշմանդամություն ունեցող մարդկանց ամենագլխավոր հիմնախնդիրներից մեկը:
Aravot.am-ի այն հարցին, թե հաշմանդամություն ունեցող անձանց վերաբերվող ինչ հիմնական խնդիրներ են լուծվել գործող քաղաքապետ Տարոն Մարգարյանի ղեկավարության տարիներին, «Աշխարհն առանց արգելքների» հ/կ նախագահը չցանկացավ պատասխանել՝ պատճառաբանելով, որ ինքը ապրում է Աբովյան քաղաքում եւ իրավասու չէ Երեւանի քաղաքապետի աշխատանքին գնահատական տալ:
Իսկ հինգ բալից ինչքա՞ն կգնահատեք գործող քաղաքապետի աշխատանքը հարցին ի պատասխան՝ նշեց. «Քաղաքապետի աշխատանքը գնահատում եմ 1»:
Արման Մուշեղյանը թեեւ նշեց, որ Տարոն Մարգարյանը Երեւանի քաղաքապետերից աչքի է ընկնում իր բաց գործունեությամբ, սակայն հաշմանդամություն ունեցող անձանց համար անմատչելի տրանսպորտի խնդիրը նրա օրոք եւս լուծում չստացավ:
Աշոտ ԱԹԱՅԱՆ
