90 տարի է անցել այն օրվանից, երբ երկրային աշխարհին հրաժեշտ տվեց Ամենայն հայոց բանաստեղծ Հովհաննես Թումանյանը: Այդ 9 տասնամյակ բաժանող տարիները ոչ թե հեռացրել, այլ ընդհակառակը՝ նրան ավելի ու ավելի են մոտեցրել ընթերցողին:
Այս իրողությունն էին ընդգծում Թումանյանի հիշատակի ոգեշնչման միջոցառման մասնակիցները, ովքեր հավաքվել էին Խնկո-Ապոր անվան գրադարանում: «Լոռվա ձոր» հայրենակցական միության նախագահ, բանասիրական գիտությունների դոկտոր, պրոֆեսոր Սերգո Երիցյանը, «Էդիթ-Պրինտ» հրատարակչության ղեկավար Մկրտիչ Կարապետյանը, ճարտարապետության դոկտոր, պրոֆեսոր Գառնիկ Շախկյանը, բանաստեղծներ Սուրեն Մուրադյանը, Լիպարիտ Սարգսյանը եւ մյուս ելույթ ունեցողները ներկայացրին Թումանյանի գրական ժառանգության՝ միշտ ընթերցողներին մոտիկ գտնվելու իրողությունը: Նրանց ընդգծմամբ՝ յուրաքանչյուր ընթերցող, անկախ տարիքից, թումանյանական աշխարհում գտնում է իր սիրելի անկյունը:
Այս ամենն ավելի ակնառու եւ հասկանալի դարձավ, երբ բեմահարթակը տրամադրվեց երեխաներին՝ Խնկո-Ապոր անվան գրադարանի սաներին, Երեւանի Գագիկ Ստեփանյանի եւ Հովհաննես Թումանյանի անվան դպրոցների աշակերտներին: Նրանք ձգտել էին Թումանյանի ստեղծագործությունների բովանդակությանը հաղորդել նոր, ժամանակակից հնչեղություն եւ ձեւ: Ոգեկոչման միջոցառման մասնակիցներին Խնկո-Ապոր անվան գրադարանի նախասրահում դիմավորում էր թումանյանական գրքերի ցուցահանդեսը, ուր ներկայացված էին «Էդիթ-Պրինտ» հրատարակչության 37 գրքերը: Այդ ամենը լույս է տեսել 3 տարվա ընթացքում: «Թումանյանական հրատարակչությունները, որ իրականացնում ենք բանաստեղծի թոռնուհու՝ բանասիրական գիտությունների դոկտոր Իրմա Սաֆրազբեկյանի եւ «Լոռվա ձոր» հայրենակցական միության հետ համատեղ, կշարունակենք նաեւ ապագայում»,- ասում է «Էդթ-Պրինտ» հրատարակչության ղեկավար Մկրտիչ Կարապետյանը:
«Նման իրադարձությունները մեզ հնարավորություն են ընձեռում ետ նայել եւ ծանրութեթեւ անել մեր մեծերի թողած գրական ժառանգությունը,- ասում է «Լոռվա ձոր» հայրենակցական միության նախագահ Սերգո Երիցյանը,- նորօրյա ավանդույթների ձեւավորումը, որոնք մեզ պատգամում են ապրել թումանյանավարի, այն համամարդկային չափանիշներով ու փիլիսոփայությամբ, որոնք այդքան շռայլորեն իր ընթերցողներին է փոխանցել Մեծն Թումանյանը»:
Կարդացեք նաև
ՄԱՐԻՆԵ ԱՎԵՏԻՍՅԱՆ
«Առավոտ» օրաթերթ
