Համացանցում մեր որոնման արդյունքներից պարզ դարձավ, որ դեռեւս նախորդ տարի ՀՀ կրթության եւ գիտության նախարարության մամուլի ծառայությունը հաղորդագրություն է տարածել, որի համաձայն՝ Երեւանի Վ. Բրյուսովի անվան պետական լեզվաբանական համալսարանում իրականացված վերահսկողության ընթացքում բացահայտվել եւ արձանագրվել են համալսարանի ռեկտորի կողմից կատարված մի շարք խախտումներ, որոնք առնչվում են համալսարանի կրթական գործունեության մի շարք ուղղություններին։ ԿԳ նախարար Արմեն Աշոտյանը դեռ այն ժամանակ հայտարարել էր, որ ստուգումները տեղի են ունեցել նախքան համալսարանի ռեկտոր Սուրեն Զոլյանին խիստ նկատողություն հայտնելը։ Մասնավորապես, ստուգումները տեղի են ունեցել 2012 թ. մարտի 20-27-ին։
Ի դեպ՝ համացանցում տեղեկություն գտանք նաեւ այն մասին, որ դեռեւս Բրյուսովի անվան լեզվաբանական համալսարանի ռեկտոր Սուրեն Զոլյանը դիմել էր ՀՀ վարչական դատարան, բայց ոչ թե իր՝ աշխատանքից ազատման հրամանի դեմ, այլ Կրթության եւ գիտության նախարարության կողմից Բրյուսովում կատարված ստուգումների արդյունքում ապրիլի 12-ին կայացված ակտը վիճարկելու համար։ Ըստ այդ ակտի, բուհում խախտումներ են հայտնաբերվել, սակայն նրան աշխատանքից ազատելու հիմքում այդ ակտը չի դրվել, այլ նրա արտասահման մեկնելը՝ առանց Արմեն Աշոտյանի թույլտվության։ Զոլյանը հայցադիմումում նշել է, որ ԿԳՆ-ն ստուգումների ժամանակ ակնհայտորեն գերազանցել է իրեն վերապահված լիազորությունները, եւ ակտը հակասում է ՀՀ օրենսդրությանը։ Եզրակացություն՝ Սուրեն Զոլյանին՝ ԱԱԾ կանչելը բացարձակ կապ չունի նրա՝ Ազատության հարթակում երեւալու եւ այնտեղից ելույթ ունենալու հետ։ Զոլյանը ԱԱԾ ուշադրության կենտրոնում հայտնվել է ոչ թե իր քաղաքական կեցվածքի, այլ կոնկրետ այն բանի համար, որ վերջինիս անվան հետ լուրջ չարաշահումներ են կապվում։ Եվ այս պատմության մեջ ամենազզվելին այն է, որ Զոլյանը այս ամենը շատ լավ իմացել է, պարզապես նա փորձել է օգտագործել Ազատության հարթակը, հրապարակում հավաքված մարդկանց՝ տպավորություն ստեղծելով, թե իբր ինքը քաղհալածյալ է։
Գոհար ՎԵԶԻՐՅԱՆ
«Չորրորդ ինքնիշխանություն»
