Հատված ԱԺ ԲՀԿ խմբակցության անդամ, գյումրեցի պատգամավոր Մարտուն Գրիգորյանի հարցազրույցից:
– Չնայած վեց ամսվա աշխատանքին ու խնդիրների նման «բարձրաձայնմանը», գյումրեցիները դժգոհում են Սամվել Բալասանյանից։ Որպես գյումրեցի, Դուք ի՞նչ կարծիք ունեք։
– Ես ներկայացրել եմ իմ անհանգստությունը Գյումրու ճանապարհների հետ կապված՝ նշելով, որ այդ ամենը թողնել միայն Գյումրու քաղաքապետարանի վրա ու ակնկալել շուտափույթ լուծում, հնարավոր չէ։ Լուրջ գումարների մասին է խոսքը՝ 2,5 մլրդ դրամ։
– Սամվել Բալասանյանը մեծահարուստ, բարեգործ ղեկավար ունեցող կուսակցության ներկայացուցիչ է, գուցե «Բարգավաճ Հայաստա՞նը» աջակցի։
Կարդացեք նաև
– Կուսակցությունն ի՞նչ աջակցի, 2,5 մլրդ դրամ տրամադրի, որպեսզի Գյումրու փողոցները բարեկարգվե՞ն։ Ո՞ր կուսակցությունն է տրամադրել։
– ԲՀԿ–ի համար ի՞նչ է 2,5 մլրդ դրամը։
– Առանց այն էլ մեր կուսակցությունը շատ գումարներ է տրամադրել Գյումրուն, Շիրակի մարզին՝ աղբատար մեքենաներ, փողոցները ձյունից մաքրող տրակտորներ, շենքերի կտուրների վերանորոգում, սպորտդահլիճների կառուցում և այլն։ Այս աշխատանքների շնորհիվ է, որ Գյումրիում ԲՀԿ-ն հաղթել է, Շիրակի մարզում բարձր տոկոսներ ստացել։ Այսօր ակնկալել, որ ԲՀԿ-ն ամբողջովին ֆինանսավորելու է, որ ճանապարհները կառուցվեն, անհնարին է, քանի որ անգամ տեղական ու պետական բյուջեի գումարներով դա միանգամից հնարավոր չէ. էլ ուր մնաց ԲՀԿ-ին մեղադրենք, թե այդ աշխատանքն ինչո՞ւ չի անում։
Ռուզան ԽԱՉԱՏՐՅԱՆ
«Իրատես de facto»
