Այսօր Գյումրու ժուռնալիստների «Ասպարեզ» ակումբի նախաձեռնությամբ Գյումրիում արդեն 5-րդ անգամ նշվեց խոսքի ազատության տոնը, որը խորհրդանշում է իշխանությունների կողմից հալածանքների ենթարկված «ԳԱԼԱ» հեռուստաընկերության փրկությունը: Հիշեցնենք, որ Գյումրու անկախ լրատվական ալիքին սկսեցին հալածել ու հարկային տեռորի ենթարկել դեռևս 2008 թվական նախահագական ընտրություններից առաջ այն պատճառով, որ վերջինս հանդգնել էր ցուցադրել ՀՀ հիմնադիր նախագահ Լևոն Տեր-Պետրոսյանի ելույթը: Հարկային պարտավորությունները իբրև թե չկատարելու, հարկերը չարամտորեն թաքցնելու մեղադրանքով հարկայինը մոտ 26 միլիոն դրամ տուգանքի էր ենթարկել հեռուստաընկերությանը: Գյումրեցիներն էլ 5 տարի առաջ հենց այս օրը փրկեցին հեռուստաընկերությունը եթերազրկումից: Նույնիսկ ԴԱՀԿ-ի աշխատակիցները , որոնք մի ձեռքով կալանք էին դնում հեռուստաընկերության գույքի ու հաշիվների վրա, մյուս ձեռքով սեփական գրպանից գումար էին հանգանակում հեռուստաընկերությանը: Կան բազմաթիվ փաստեր, երբ ծերունիները իրենց թոշակն էին նվիրում «ԳԱԼԱ» -ի փրկության համար` այսպիսով պայքարելով իրենց խոսքի ազատության համար:
Այս ամենը այսօր հիշվեց խոսքի ազատության տոնին նվիրված միջոցառմանը: Խոսքի ազատության պաշտպանության կոմիտեի նախագահ Աշոտ Մելիքյանը այս առիթով ասաց.«Մեզ հաջողվեց համատեղ ուժերով և, առաջին հերթին ես պետք է ասեմ Գյումրու հասարակության սատարման շնորհիվ, ճնշումները կանգնեցնել այն լրատվամիջոցի նկատմամբ, որը հանդգնել էր չենթարկվել անօրինական պահանջներին : Այն, ինչ որ մենք տեսնում ենք 2008 թվականին, երբ դպրոցականն իր նախաճաշի գումարն էր բերում, և թոշակառուն իր փոքր թոշակից հազար դրամ էր բերում, որպեսզի օգներ լրատվամիջոցին այդ իրավիճակից դուրս գալու, դրանք նույնիսկ հուզումնալից պահեր էին: Իսկապես շատ ճիշտ է անում Գյումրու «Ասպարեզ» ակումբը, որ այդ օր դարձրել է տոն, ընդ որում այդ տոնը ավանդական բնույթ է կրում և ես կասեի, որ կենացները այդ տոնի քաղցրանում են գնալով»:
Լևոն Բարսեղյան էլ ասաց, թե տարակույս չունի, որ այս տոնը մի օր կընդգրկվի պետական տոնացույցում: Ամեն մի պարգևատրումից առաջ մեկնաբանում էին , թե որ մի արած գործի համար են խրախուսում լրագրողին կամ լրատվամիջոցին: Օրինակ` Սամվել Կարապետյանին պարգևատրելիս, Լևոն Բարսեղյանն ասաց. «Դուք գիտե՞ ք օրինակ, որ Հայաստանը իր ազգային հարստությունից տարեկան 365 միլիոն դոլար վատնում է, ես իմացա Սամվել Կարապետյանի հրապարակախոսությունից»:
Պարգևատրեցին մի քանի լրատվամիջոցների ու կայքերի ներկայացուցիչներ, օրինակ` «Հետք» հետաքննող լրագրողների ընկերակցության լրագրող Գրիշա Բալասանյանը `պաշտոնյաների հայտարարագրերի մասին նյութեր պատրաստելու համար, լավագույն լուսանկարների համար պարգևատրվեց Panarmenian.net կայքը, «Շիրակ կենտրոն» հ/կ նախագահ Վահան Թումասյանը «Կարիտաս» բարեգործական ընկերության կողմից դրամական պարգև ստացավ՝ սոցիալական խնդիրները ինտենիսվ լուսաբանելու համար : Պարգևների մեջ կար նաև մահակ: Այդ պարգևը հանձնվեց Լենա Նազարյանին: Ինչպես ներկայացրեց մահակը հանձնողը` Սախորովի անվան մարդու իրավունքների պաշտպանության կոմիտեի Շիրակի մարզային գրասենյակի պատասխանատու Սեյրան Մարտիրոսյանը . «Լենա Նազարյանը պարգևատրվեց Եվրոպական չակերտավոր, այսպես կոչված ժողովրդավարությունը քլնգելու համար» :
Կարդացեք նաև
Նշենք, որ «ԳԱԼԱ» հեռուստաընկերությանը նվիրված այս տոնին չէին եկել «ԳԱԼԱ» հեռուստաընկերության ներկայացուցիչները:
Նունե ԱՐԵՎՇԱՏՅԱՆ
