«Իրավունքի տեսակետից եւ արարքի քրեաիրավական որակումից ոչինչ չեն տարբերում: Նույն օրենսգրքից տարբեր ձեւով ենք օգտվում: Քրեական գործերով վերաքննիչը հիմնականում իր լիազորությունների շրջանակում լուրջ իրավաբանություն չի կիրառում: Ցավալի է, որ այս գործով 5 փաստաբանների եւ 5 ամբաստանյալների բողոքը լսող դատարանից դժգոհ մնացին բոլորը, եւ դա խորհելու առիթ պետք է տար»,- Aravot.am-ին ասաց ամբաստանյալ Կարեն Հովհաննիսյանի պաշտպան, ՀՀ փաստաբանների պալատի անդամ Սեդա Սաֆարյանը:
ՀՀ քրեական գործերով վերաքննիչ դատարանը անփոփոխ էր թողել Կենտրոն եւ Նորք-Մարաշ վարչական շրջանների ընդհանուր իրավասության դատարանի անցյալ տարվա դեկտեմբերի 26-ի դատավճիռը եւ մերժել ամբաստանյալներ Վաժա Արձիարաշվիլու, Կարեն Հովհաննիսյանի, Հասմիկ Դուրգարյանի, Վարդան Եղիազարյանի, Դավիթ Ղամբարյանի, Աբգար Հովսեփյանի եւ նրանց պաշտպանների բողոքները:
Պաշտպանական կողմը Aravot.am-ին հայտնեց, որ մտադիր է բողոքարկել վերաքննիչի որոշումը:
Հիշեցնենք, որ Վրաստանի քաղաքացի Վաժա Արձիարաշվիլին մեղադրվում է Հայաստանի քաղաքացիների հետ խմբի միջոցով ՀՀ ազգային եւ ԵՊՀ գրադարաններից 150 միավոր հնատիպ գրքեր գողանալու մեջ: Ամենաբարձր պատժաչափը ստացել է Վաժա Արձիարաշվիլին՝ 10 տարի ազատազրկում:
Կարդացեք նաև
Ռուզան ՄԻՆԱՍՅԱՆ
