ՀՀԿ-ական պատգամավոր, ՀՀ ԱԺ պետաիրավական հարցերի մշտական հանձնաժողովի նախագահ Դավիթ Հարությունյանն իրատեսական չի համարում «Ժառանգության» առաջնորդ Րաֆֆի Հովհաննիսյանի՝ ուրբաթ օրը հանրահավաքում հնչեցրած պահանջները:
Հիշեցնենք, որ Սերժ Սարգսյանին ուղղված իր նամակում Րաֆֆի Հովհաննիսյանը, մասնավորաբար, պահանջել էր մինչեւ տարեվերջ արտահերթ խորհրդարանական ընտրությունների անցկացում, առնվազն հինգ մարզպետների ազատում աշխատանքից եւ այդ պաշտոններում Րաֆֆի Հովհաննիսյանի ներկայացրած մարդկանց նշանակում: «Մենք կուսակցությունում երեւի կքննարկենք, եւ ես իմ ամբողջական կարծիքն այնտեղ կարտահայտեմ: Բայց կարճ՝ ոչ»,- ասաց Դավիթ Հարությունյանը:
Aravot.am-ը պարոն Հարությունյանից հետաքրքրվեց՝ ոգեւորվա՞ծ է ինքն այն մտքից, որ Րաֆֆի Հովհաննիսյանը թույլ տվեց Սերժ Սարգսյանին՝ շարունակել պաշտոնավարել նախագահի պաշտոնում: Դավիթ Հարությունյանը ծիծաղեց. «Կարծում եմ, ձեր հարցը պատասխան չէր պահանջում, այլ միայն ժպիտ»:
Նելլի ԳՐԻԳՈՐՅԱՆ
