Մարտի 22-ին Երևանի պետական լեզվաբանական համալսարանում (ԵՊԼՀ) տեղի ունցավ «Երգում են 1-ին կուրսեցիները» խորագրով մրցույթ-համերգի եզրափակիչ փուլը։ Այն կազմակերպել էին Հայաստանի երիտասարդական հիմնադրամը և ԵՊԼՀ ուսանողական խորհուրդը:
ԵՊԼՀ ռեկտոր Գայանե Գասպարյանը, ողջունելով ուսանողներին, մաղթեց, որպեսզի ԵՊԼՀ-ում միշտ հնչեն երգն ու ծիծաղը։ Իսկ բուհի ուսանողական խորհրդի նախագահ Անահիտ Թունյանը նկատեց, որ բուհի ուսանողներն աչքի են ընկնում ոչ միայն լեզվական գիտելիքներով և հասարակական ակտիվությամբ, այլև երգելու տաղանդով։ Նա նաև շնորհակալություն հայտնեց Հայաստանի երիտասարդական հիմնադրամին և համալսարանի ղեկավարությանը՝ ուսխորհրդին մշտապես աջակցելու համար:
Մրցույթի նախընտրական փուլը տեղի էր ունեցել փետրվարի 25-ին, որի ընթացքում ընտրվել էին լավագույն 5 կատարողները։ Եզրափակից փուլում ժյուրիի կազմում էին երգիչ Անդրեն, հաղորդավար, նախկին բրյոսովական Գոհար Գասպարյանը, «Վիտամին ակումբի» հումորիստ Գարիկ Պապոյանը, ԵՊԼՀ ռեկտորի խորհրդական Հասմիկ Ափյանը և բուհի մշակութային միջոցառումների համակարգող Անուշիկ Տեր-Ղուկասյանը։
Կարդացեք նաև
«Երգում են 1-ին կուրսեցիները» մրցույթի մասնակիցները հանդես եկան անհատական կատարումներով, այնուհետև ոչ մրցութային զուգերգերով երգեցին հայ էստրադայի երիտասարդ երգիչ-երգչուհիներ Մարիաննա Հովհաննիսյանի, Սրբուհի Սարգսյանի, Արծրուն Խանգելդյանի, Արթուր-Ալեքի, Մարի և այլոց հետ։
Թեժ պայքարի արդյունքում մրցույթի հաղթող ճանաչվեց Հայկանուշ Սաժումյանը։ Նա կստանա մեկ երգ անվճար ձայնագրելու իրավունք:
Հայաստանի երիտասարդական հիմնադրամի
հասարակայնության հետ կապերի ծառայություն
