37 եւ ավելի տարիք ունեցողներն ազատվում են քրեական պատասխանատվությունից
Մարտի 22-ին ոստիկանության Իջեւանի բաժնում կայացած հանդիպման ժամանակ, որին մասնակցում էին Տավուշի մարզի համայնքների ղեկավարներ, դպրոցների տնօրեններ, քննարկման հիմնական թեմաներից մեկը ժամկետային զինվորական ծառայությունից խուսափելու համար հետախուզվողների հարցն էր: Նրանք տարիներ առաջ Ռուսաստան հիմնական բնակության են մեկնել: Ոստիկանության Տավուշի մարզային վարչության պետի օպերատիվ գծով տեղակալ Արմեն Օհանյանն ասաց, որ Տավուշի մարզում դրանց թիվը մոտ 300 է: Նրանց մի մասը ընտանիքներով է հեռացել Հայաստանից, շատերը Ռուսաստանի քաղաքացիություն ունեն: Ա. Օհանյանն ասաց, որ այդ անձինք Ռուսաստանում ոստիկանների հետ խնդիրներ են ունենում, ՌԴ քաղաքացիություն ստացած անձանց նկատմամբ Հայաստանում քրեական հետապնդումը չի դադարեցվում: Նշվեց, որ 27 տարեկան լրացած անձինք ազգային բանակ չեն զորակոչվում, իսկ 37 տարեկան լրացածները ազատվում են ժամկետային զինվորական ծառայությունից խուսափելու համար քրեական հետապնդումից:
Խորհրդակցությունում նշվեց, որ այդ 300 անձանց գրեթե կեսի տարիքը 37-ն անց է, նրանց շատերը թոռնատեր են: Արմեն Օհանյանը գյուղապետերին հորդորեց, որպեսզի համագյուղացի հետախուզվողների հետ կապ հաստատեն՝ համապատասխան փաստաթղթեր պատրաստելու եւ օրենքով սահմանված կարգով նրանց նկատմամբ քրեական հետապնդումը դադարեցնելու համար: Պ-ն Օհանյանը հայտարարեց՝ դրա համար պարտադիր չէ, որ հետախուզման մեջ գտնվող անձինք գան Հայաստան, նրանք կարող են այդ նպատակով լիազորագիր ուղարկել:
Ոսկան ՍԱՐԳՍՅԱՆ
