Րաֆֆի Հովհաննիսյանի ստորագրահավաքին մասնակցող գյումրեցիները անխնա քննադատում են Սերժ Սարգսյանին
Երեկ Գյումրու Թատերական հրապարակում բացօթյա ստորագրահավաք էր սկսվել` ի օգուտ Րաֆֆի Հովհաննիսյանի, որը և տներից դուրս էր հանել քաղաքի գրեթե ամբողջ բնակչությանը: Տեսնելով, որ լուսաբանում ենք այս իրադարձությունը` «Ժառանգության» ներկայացուցիչների շուրջբոլորը հավաքված մարդիկ, նույնիսկ անցորդները մոտենում էին մեզ` խնդրելով իրենց խոսքը տեղ հասցնել Սերժ Սարգսյանին: Նրանք ժամեր շարունակ վերլուծում էին նախագահի մամլո ասուլիսը` ամոթանք տալով «սուտ խոսելու ու երկիրը բոմժանոց դարձնելու համար»: Նրանցից մեկը` Զավեն Կիրակոսյանը, ով նախկինում բավական մեծ պաշտոններ էր զբաղեցրել, այսպես արտահայտեց իր դժգոհությունը. « Քանի կա էս գործող իշխանությունը, ժողովուրդը զրոյի է հավասարված, պիտի արտագաղթի ու անոթի մեռնի , որովհետև հանրապետությունում միայն ծերակույտն է մնացել, ջահելները բոլորը փախել են: Բոլորը էս օրենքներից են փախնում, թեպետ կան լավ օրենքներ, բայց գործող չկան, հենց իրանից` ընկեր Սերժից սկսած օրենքը խախտող են: Սահմանադրական դատարանը վերցնենք, էս վերջերս Րաֆֆին մտավ Սահմանադրական դատարան, ո՞վ չգիտի, որ Րաֆֆի Հովհաննիսյանին պիտի մերժեին: Սահմանադրական դատարանը Սերժ Սարգսյանի ենթական է, հենց կարող եմ ասել, որ իրա տիկինն է Սահմանադրական դատարանի գլխավոր դատավորը: Ամեն տեղ դատավորություն է անում: Էլ ո՞ր մեկն ասեմ, նախկինում էլ ինչ ասես աշխատել եմ, գործարաններ եմ հիմնել, սուի պետ եմ եղել»,- ասաց գյումրեցի տարեց Զավեն Կիրակոսյանը` նշելով իր բնակության հասցեն` Կոմինտերնի 18 տուն: «Եթե ուզում են, թող շատ շուտ գան ետևիցս, որ մի հատ թքեմ եկողի երեսին», -զայրացած հավելեց մեր զրուցակիցը:
Մեկ այլ ծերունի էլ հայտարարեց, որ Սերժ Սարգսյանը սուտ է ասում, թե կբարձրացնի իրենց թոշակները: «Երկու հազար ռուբլի բարձրացնի, որ նորից գազը թանկացնի՞, թեև արդեն թանկացրել է, ռիսկ չի անում ասելու »: Մի երիտասարդ էլ, միջամտելով խոսակցությանն, ասաց. «Քուր ջան, պարոն Սերժին ասեք, թող նեղություն չկրի, աշխատավարձ բարձրացնի, մինչև հունիս սաղ կգնան, էստեղ կմանան միայն տեղաշարժվելու անընդունակ մարդիկ, գերբի վրայի արծիվն անգամ ելել-փախնում է , հայն ուր էլ գնա, իր համար նպաստավոր է, անգամ Սերժի մատնանշած Ռուսաստանը»:
Զավեն Կիրակոսյանը, նորից միջամտելով այս խոսակցությանը, ասաց. «Մոռացա ասեի, որ Սերժը իրա Սաշիկ ախպոր հետ օլիգարխ է, էլ ինչպե՞ս խոստավանի, որ երկրում, առավել ևս Ազգային ժողովում օլիգարխ կա: Լիքը օլիգարխ կա, էն էլ ինչքան անգրագետ, ծովը կլոր «օ»-ով են գրում, վերջում էլ «ֆ» տառով ավարտում …Ասում է `1/3 մասն է Հայաստանի աղքատ, չի ասում 1/ 77-ը , տվածդ 24 հազար դրամ չէ՞, էնքան վախեցած էիր խոսում , մի ստի, ժողովրդի աչքերի մեջը նայի: էդպիսի մարդ մոլորակի վրա չի ծնվել, բա էն վարչապետը, սաղ կյանքը զբաղվեց պարտք բերելով ու վրեքս բարդելով, ո՞ր սերունդը պտի տա ձեր արած պարտքերը , էս ի՞նչ երկիր դարձրեցիք էս գյոզալ Հայաստանը: Բա էն Ծառուկյան Գագոն, որ լավ տղա է ձևանում, մեկին 1 միլիոն է տալիս, մյուսին` 2, բյուջեն էլ ոչ մեկը փող չի փոխանցում, բա էլ ինչի՞ հաշվին եք թոշակի ու աշխատավարձի բարձրացումից խոսում »:
Կարդացեք նաև
Նունե ԱՐԵՎՇԱՏՅԱՆ
