Երևանի ավագանու ընտրություններում մասնակցության հայտ ներկայացրած կուսակցություններն ու դաշինքները ներկայացրել են իրենց ցուցակները: Կուսակցությունների շարքում կա մեկ դաշինք` «Բարև Երևան»-ը, որտեղ ներգրավված են «Ժառանգություն», «Ժողովրդավարական ուղի», «Պահպանողական կուսակցություն» կուսակցությունների ներկայացուցիչներ:
Դաշինքի ցուցակում ընդգրկված են 64 անդամներ: Առաջին եռյակում են «Ժառանգություն» կուսակցության փոխնախագահ Արմեն Մարտիրոսյանը, Կրթության ազգային ինստիտուտի տնօրեն Անահիտ Բախշյանն ու «Մելտեքս» ՍՊԸ տնօրեն, «Ա1+» հեռուստաընկերության նախագահ Մեսրոպ Մովսեսյանը: Դաշինքի ցուցակն առանձնանում է նրանով, որ դրանում ընդգրկված անձանց մեծամասնությունը հասարակական դաշտի ներկայացուցիչներ են. լրագրողներ, հասարակայնության հետ կապերի պատասխանատուներ, իրավաբաններ, բիզնես-խորհրդականներ: Օրինակ` ցուցակում է Lurer.com կայքի խմբագիր Դավիթ Սանասարյանը, «Անի Քոչար փրոդաքշըն» ՍՊԸ տնօրեն, Yes ամսագրի հիմնադիր Անի Քոչարյանը, կամ ինչպես շոու-բիզնեսում է հայտնի՝ Անի Քոչարը: Նշենք, որ նրա ամուսինը «Ժառանգություն» խմբակցության փորձագետ Արման Մուշեղյանն է: «Բարև Երևան»-ի ցուցակում է նաև «Արարատ» ամսագրի գլխավոր խմբագիր Ալեն Սիմոնյանը: Ի տարբերություն ՀՀԿ-ի, ԲՀԿ-ի ցուցակների` այստեղ ներկայացված անձանց ընդհանուր թվում փոքր տոկոս են կազմում անհատ ձեռներեցները, գործարարները:
«Բարև Երևան»-ի ցուցակում է «Պետական կարիքների զոհեր» ՀԿ նախագահ Սեդրակ Բաղդասարյանը, որը բազմիցս հանդես է եկել Երևանում տեղի ունեցող ապօրինի շինարարությունների դեմ, հայտնի է պատմամշակութային հուշարձանների յուրացման դեմ պայքարողների շարքում: Սպառողների միության նախագահ Արմեն Պողոսյանը ևս ընդգրկված է «Բարև Երևան»-ի ցուցակում: Ցուցակի 13-րդ հորիզոնականում «Ժառանգություն» կուսակցության մամուլի խոսնակ Հովսեփ Խուրշուդյանն է: Երևանի Վ. Բրյուսովի անվան Լեզվաբանական համալսարանի նախկին ռեկտոր Սուրեն Զոլյանը, ով լուրջ հակամարտության մեջ է ԿԳ նախարար Արմեն Աշոտյանի հետ, ևս այս ցուցակում է:
ՀՅԴ 65 հոգանոց ցուցակում քիչ են հանրության շրջանում ճանաչում ունեցող անձինք: Օրինակ` ցուցակում են «Տուն Դեպո»-ի մատակարարը, ԱԺ վարորդը, «Վիվասել Ղ տելեկոմ» ՓԲԸ զանգերի կենտրոնի օպերատորը և այլք:
Կարդացեք նաև
ՀՅԴ ցուցակում կան նաև լրատվական դաշտի ներկայացուցիչներ. Հանրային հեռուստաընկերության Առաջին լրատվականի մեկնաբան Ալեսյա Բեջանյանը, «Երկիր խմբագրություն» ՍՊԸ տնօրեն Արայիկ Հովհաննիսյանը:
ՀԱԿ-ի 42 հոգանոց ցուցակում ևս շատ չեն հայտնիները: Փոխարենը մեծ է գործազուրկների թիվը:
ՀԱԿ ցուցակում ընդգրկված են նաև ակադեմիական համակարգի ներկայացուցիչներ. օրինակ` ՀՀ ԳԱԱ Հնագիտության և Ազգագրության ինստիտուտի ավագ գիտաշխատող Վահե Բոյաջյանը, ցուցակում կան հատուկենտ գործարարներ, այն մյուս կուսակցությունների ներկայացրած ցուցակներից առանձնանում է ուսանողների մեծ թվով:
Ավագանու ընտրություններին մասնակցում է նաև «Առաքելություն» կուսակցությունը: Ներկայացված 29 հոգանոց ցուցակում մեծ տեղ են զբաղեցնում անկուսակցականները: Մասնավորապես՝ նրանցից 12-ը անկուսակցական են: Ցուցակում հանրության լայն շրջանակներին հայտնի մարդիկ չկան: Ցուցակում հիմնականում ընդգրկված են մարկետոլոգներ, բանկային գործի մասնագետներ:
Տաթև ՀԱՐՈՒԹՅՈՒՆՅԱՆ
