Ինչ մնում է Սերժ Սարգսյանի ինագուրացիային Վարդան Օսկանյանը գնալո՞ւ է, թե` ոչ, ասաց. «Ժամանակը կգա, կերեւա»
«Ընտրությունները անցել են լուրջ խախտումներով: Այո, ես կասկածում եմ արդյունքների մեջ եւ դրա մեղավորը իշխանություններն են»,- այսօր խորհրդարանական ճեպազրույցների ժամանակ ասաց ԲՀԿ խմբակցության պատգամավոր Վարդան Օսկանյանը`պատասխանելով հարցին, թե ինչո՞ւ մինչ այժմ ինքը չի գնահատել անցած նախագահական ընտրությունները: Ինչ մնում է Սերժ Սարգսյանի ինագուրացիային Վարդան Օսկանյանը գնալո՞ւ է, թե`ոչ, ասաց. «Ժամանակը կգա, կերեւա»:
Երեկ ՀՀ կրթության եւ գիտության ՀՀԿ-ական նախարար Արմեն Աշոտյանը լրագրողների հետ զրույցում մեկնաբանելով այն, որ Վարդան Օսկանյանը գլխավորում է Երեւանի ավագանու ընտրություններում ԲՀԿ-ի ցուցակը, ասել էր, որ Օսկանյանը դեռ ներքաշված է գումարների լվացման գործում. «Բայց ուզում եմ որպես երևանցի հասկանալ՝ որքանո՞վ այս հմտությունները կարող են պետք գալ Երևանի փողոցները մաքուր պահելու գործում»: Այսօր լրագրողները Վարդան Օսկանյանին խնդրեցին արձագանքել այդ դիտարկմանը: «Ես պատասխանում եմ միայն այն մարդկանց ասածներին, որոնց ասածներին հասարակությունը կարող է ուշադրություն դարձնել»,- ասաց Վարդան Օսկանյանը:
Նելլի ԳՐԻԳՈՐՅԱՆ
