Մայիսի 5-ին կայանալիք Երևանի ավագանու ընտրություններին առաջադրված կուսակցությունները, դաշինքներն արդեն ներկայացրել են իրենց ցուցակները: ԲՀԿ-ն ներկայացրել է 195 հոգանոց ցուցակ, որտեղ գերակշում են գործազուրկները: Նկատենք, որ ցուցակում ներգրավված անձանց մեծամասնությունը ներկայացնում է ԲՀԿ-ն, ցուցակում հանգրվանած անձանցից միայն 20-ն են անկուսակցական և երկուսը` ՄԱԿ կուսակցությունից:
ԲՀԿ ցուցակը գլխավորում են Վարդան Օսկանյանը, Գուրգեն Արսենյանն ու Աբրահամ Մանուկյանը: Տեղեկություններ կան, որ ԲՀԿ-ում ցանկանում են, որ վերոնշալ երեք անձանցից Երևանի քաղաքապետ դառնա Աբրահամ Մանուկյանը: Նա «Նոր Ձորաբերդի» տերերից է, ունի շինարարական ֆիրմաներ եւ զբաղվում է սուրճի ներմուծմամբ: Հատկանշական է այն, որ նա ժամանակին պատգամավոր է դարձել ՀՀԿ համամասնական ցուցակով, 2007-ին էլ վարչապետ Սերժ Սարգսյանի որոշմամբ նշանակվել Հայաստանի առողջապահության նախարարի տեղակալ: Իսկ նրա որդին այժմ աշխատանքի և սոցիալական հարցերի նախարարությունում զբաղեցնում է վարչության պետի պաշտոն:
Վերջին շրջանում շահարկվեց այն հարցը, թե ԲՀԿ ցուցակի կազմման վրա մեծ ազդեցություն է ունեցել ՀՀ երկրորդ նախագահ Ռոբերտ Քոչարյանը: Զուգադիպությամբ, թե այդ ազդեցության արդյունքում ԲՀԿ ցուցակի 42-րդ հորիզոնականում է Ռ. Քոչարյանի եղբոր` Վալերի Քոչարյանի դուստրը` Իրինա Քոչարյանը:
Հանրության շրջանում հայտնիների կողքին ԲՀԿ ցուցակում ընդգրկված են «Երևակ», «Մխիթար Սեբաստացի», Երևանի Իրավատնտեսագիտական քոլեջի մանկավարժներ, «Զվարթնոց» օդանավակայանի աշխատակիցներ, անհատ ձեռներեցներ, բուքմեյքերական ընկերություն, օպերատոր, մատակարարներ:
Կարդացեք նաև
ՀՀԿ-ն ևս ներկայացրել է 195 հոգանոց ցուցակ: Այստեղ հայտնիների հրավառություն է: Առաջին եռյակում են գործող քաղաքապետ Տարոն Մարգարյանը, «Հայաստանի շախմատի ակադեմիա» հիմնադրամի տնօրեն Սմբատ Լպուտյանն ու ՀՊՃՀ ռեկտոր Հովհաննես Թոքմաջյանը:
ՀՀԿ ցուցակում շատ են ճանաչված արվեստագետները` Արա Երնջակյանը, Մարտին Վարդազարյանը, Լևոն Իգիթյանը, Միքայել Դովլաթյանը, Ալ. Սպենդիարյանի անվ. օպերայի և բալետի ազգային ակադեմիական թատրոնի տնօրեն Կամո Հովհաննիսյանը:
ՀՀԿ-ի ցուցակում ընդգրկվածների շարքում կան բազմաթիվ մարդիկ, ում անունը կապվում է Սամվել Ալեքսանյանի անվան ու նրա բիզնեսների հետ: Օրինակ` ցուցակի 44-րդ հորիզոնականում «Լուս Աստղ շուգր» ՍՊԸ-ի փոխտնօրեն Արթուր Պետրոսյանն է: Նկատենք, որ «Լուս Աստղ շուգր» (Ախուրյանի շաքարի գործարան) ընկերությունը (փոխկապակցված է ԱԺ պատգամավոր Սամվել Ալեքսանյանի հետ) հարկերը նվազեցրել է 95%-ով։ Բացի այդ՝ ընկերությունում առնվազն կիսով չափ կրճատվել է աշխատակիցների թիվը։ 88-րդ հորիզոնականը զբաղեցնում է «Ալեքս Գրիգ» ՍՊԸ-ի «Երևան Սիթի» սուպերմարկետների ցանցի տնօրեն Վահրամ Կիրակոսյանը, ՀՀԿ-ի ցուցակում է «Ալեքս Գրիգ» ՍՊԸ-ի «Երևան Սիթի», սուպերմարկետների ցանցի անվտանգության ծառայության պատասխանատու Արշակ Ամիրյանը:
ՀՀԿ ցուցակում են նաև Երևանի վարչական շրջանների ղեկավարները, ԳԱԱ ինստիտուտների տնօրենները, ԵԿՄ վարչության փոխնախագահ Արա Կետիկյանը, ով ներկայացված է որպես անկուսակցական, «Մամա Միա» պիցերիաների ցանցի ղեկավար Կոնստանտին Բակլաչյանը: ԱԺ պատգամավոր Մանվել Գրիգորյանի օգնական Մեսրոպ Մանուկյանը ևս ընդգրկված է ՀՀԿ ցուցակում: Հիշեցնենք, որ վերջերս Մ. Գրիգորյանի օգնականներից մեկը ԱԺ պատգամավոր Կորյուն Նահապետյանի օգնականի հետ ծեծկռտուքի էր բռնվել:
Հետաքրքրական է նաև այն, որ ՀՀԿ ցուցակում է «Իրավունք մեդիա» ՍՊԸ-ի տնօրեն Գեղամ Գրիգորյանը, նույն թերթի լրագրող Լիլիթ Եղիազարյանը:
ՕԵԿ-ի ցուցակը թե՛ ներկայացվածների ընդհանուր թվով, թե՛ հանրության շրջանում մեծ ճանաչում վայելող գործիչների թվով զիջում է վերոնշյալ երկու կուսակցություններին: ՕԵԿ ցուցակում 105 հոգի է ընդգրկված: Այն գլխավորում են ԱԻՆ նախարար Արմեն Երիցյանը, ՕԵԿ վարչության անդամ Հովհաննես Շահինյանը, թիվ 185 դպրոցի ուսուցչուհի Սոֆյա Արթենյանը: Ցուցակում բացառապես ՕԵԿ անդամներն են: Այստեղ մեծ թիվ են կազմում Եվրոպական կրթական տարածաշրջանային ակադեմիան, ՀՀ արտակարգ իրավիճակների նախարարությունը ներկայացնող անձինք, որտեղ ՕԵԿ-ն ունի գերիշխանություն: ՕԵԿ ցուցակն առանձնանում է նրանով, որ այստեղ ընդգրկված են նաև բլոգերներ: Բժիշկ-կոսմետոլոգներին, դաստիարակներին և ինժեներ-մեխանիկներին ևս ՕԵԿ-ում չեն մոռացել:
Տաթև ՀԱՐՈՒԹՅՈՒՆՅԱՆ
ՕԵԿ ցուցակում պետք էր ընդգրկել գոնե մեկ՝ արական սեռին սպասարկող գինեկոլոգ…
,,Էն ո՞վ է՝ ո՞վ,, շարքից՝
,,Դո՛ւ՝
երեք տառ,
Դո՛ւ՝
Հասարակ մի դերանուն,
Եվ ընդամենն այդ քո երեք հատիկ տառով
Մեր բովանդակ հայությանն ես ներկայանում…,,
Պատասխանը՝ հաջորդ դասին:))