Գագիկ Համբարյանի կարծիքով ՝ մեր երկրում նկատվում է կադրային քաղց:
ՀՀ նախագահի`օրերս լրատվամիջոցների ներկայացուցիչների հետ հանդիպումից հետո բնակիչներից շատերի մոտ այնպիսի տպավորություն է ստեղծվել, որ նախագահը չի ուզում անգամ աննշան կադրային փոփոխություններ կատարել, եւ, այսպես ասած, դողում է թե ՀՀԿ-ական օլիգարխների և թե իր իսկ կողմից նշանակված կադրերի վրա:
Այսօր Aravot.am-ը քաղաքագետ Գագիկ Համբարյանին հարցրեց` անփոփոխ կադրերով հնարավո՞ր է արդյոք երկրի զարգացում, և առհասարակ ի՞նչ կադրային քաղաքականություն պիտի վարի Սերժ Սարգսյանը , որպեսզի ժողովրդի մեծ մասը չկանգնի Ազատության հրապարակում: «Նախ, փաստենք, որ Հայաստանի Հանրապետությունում նկատվում է կադրային քաղց, արդեն տեղի է ունենում շրջապտույտ նույն անձանց շուրջ, որոնք ժամանակին եղել են պաշտոնյաներ, մի ժամանակ պաշտոնը կորցրել են, հիմա նորից նրանց անունները հոլովվում են, դա մեկ: Երկրորդ խնդիրն այն է, որ իշխանությունները ուզում են ավելի թեթև մեթոդներով թոթափել նախագահական ընտրություններից հետո ժողովրդի այս ըմբոստացումը` աշխատավարձերի, սոցիալական նպաստների և թոշակների բարձրացումով, որի մասին հայտարարեց նախագահն իր մամուլի ասուլիսի ժամանակ, և որը պետք է տեղ ունենա ամռանը: Եվ նրանք հուսով են, որ այդպիսի քայլերով կզսպեն ժողովրդի ըմբոստացումը: Բայց ես ինքս գտնում եմ, որ մեր իշխանությունները շատ մեծ մտածելիք ունեն և արտաքին քաղաքականության ոլորտում և նաև արագընթաց ծրագրեր պետք է մշակեն նոր աշխատատեղերի ստեղծման, ժողովրդի սոցիալ-տնտեսական վիճակը բարելավելու պահով: Կադրային խնդիրները շատ կարևոր են. այն քաղաքական գործիչները, որոնք իրենց սպառել են, պետք է անպայման հեռանան»-, ասաց մեր զրուցակիցը :
Aravot.am-ի այն հարցին էլ , թե օրինակ վարչապետ Տիգրան Սարգսյանին համարո՞ւմ եք իրեն սպառած մարդ, քաղաքագետն ասաց. « Ինքը, լինելով շատ խելացի բանկիր, բավական ժուժկալ գտնվեց ժողովրդի նկատմամբ, ես գտնում եմ, որ էդ մարդը ունի բանկիրի հոգեբանություն. շատ ստանալ և քիչ հետ տալ: Կարող է շատ լավ բանկիր է, և իրոք Հայաստանի բանկային համակարգը կայացավ շնորհիվ իրեն, բայց նա իրեն լավ չդրսևորեց որպես վարչապետ, այնպես չարեց, որ ժողովուրդը իրեն ընդունի որպես վարչապետ: Ինչքան էլ ուզում է տնտեսական ճգնաժամի պատճառով Հայաստանը խնդիրներ ունենար, պետք էր մի քիչ էլ մտածել ժողովրդի սոցիալ-տնետսական վիճակի մասին, առավել ևս որ մեր ժողովուրդը շատ պահանջկոտ չէ, բավարարվում է մինիմալով »:
Կարդացեք նաև
Ըստ Գագիկ Համբարյանի, Ռուսաստանում տարին 2-3 անգամ Պուտինը աշխատավարձ ու թոշակ է բարձրացնում, մենք էլ կարող էինք որևէ մենաշնորհային ոլորտի հաշվին բարձրացում կատարել, թեկուզև տարին մեկ անգամ գոնե 3-4 հազար դրամով: Մինչդեռ, ըստ մեր զրուցակցի, Տիգրան Սարգսյան իր պաշտոնավարման 5 տարիների ընթացքում ընդամենը 1 անգամ 2500 դրամով բարձրացրեց թոշակները և նույնքան էլ աշխատավարձը`պատճառաբանելով, թե համաշխարհային տնտեսական ճգնաժամ է:
Նունե ԱՐԵՎՇԱՏՅԱՆ
