Նրան դատի են տվել 3 հազար դոլար պարտքի համար
Դիլիջան քաղաքի բնակիչ Արմեն Խառատյանը դիմել է Տավուշի մարզի առաջին ատյանի դատարան` «Սահմանապահ Տավուշ» հասարակական բարեգործական կազմակերպության տնօրեն Սոս Եղիշի Սահակյանից եւ նրա եղբայր Սահակ Եղիշի Սահակյանից համապարտության կարգով 3000 ԱՄՆ դոլարին համարժեք 1218 870 դրամ պարտքի եւ 2011թ. սեպտեմբերի 30-ից մինչեւ հայցադիմումը ներկայացնելու օրը՝ 2013թ. հունվարի 31-ը հաշվարկված 195019 դրամ տոկոսների գումարների բռնագրավման պահանջով:
Հայցադիմումի մեջ որպես Սոս Սահակյանի բնակության վայր է նշվել Տավուշի մարզի Ոսկեվան գյուղը, սակայն այդ հասցեով ուղարկված դատական ծանուցման փոստային ծրարները ետ են վերադարձվել՝ ծրարների վրա գրված «տեղափոխված է» մակագրությամբ: Ոսկեվանի գյուղապետարանից դատարանի հարցմանը պատասխանել են, որ Սոս Սահակյանը բացակայում է համայնքից, գյուղապետարանում չգիտեն նրա գտնվելու վայրը: Նկատի ունենալով, որ Ս. Սահակյանի գտնվելու վայրի անհայտ լինելն անհնար է դարձնում այդ քաղաքացիական գործի քննությունը, հայցվորի ներկայացուցիչ Արմենակ Մանթաշյանը միջնորդել է Սոս Սահակյանի նկատմամբ հայտարարել հետախուզում:
Կարդացեք նաև
Դատական նիստի վայրի եւ ժամանակի մասին պատշաճ ծանուցված Սահակ Սահակյանը չի ներկայացել գործի քննությանը: Մարտի 12-ին Տավուշի մարզի առաջին ատյանի դատարանի դատավոր Աշոտ Խաչիկյանը որոշել է Սոս Սահակյանի նկատմամբ հայտարարել հետախուզում: Հավելենք, որ Սոս Սահակյանը հաշմանդամ է: 1990-ական թվականների սկզբին պաշտպանական դիրքում ծառայակից ընկերներից մեկը ինքնաձիգի հետ անզույշ վարվելու հետեւանքով ծանր վիրավորել է Սոս Սահակյանին, նոյեմբերյանցի բժիշկներին մեծ դժվարությամբ է հաջողվել փրկել նրա կյանքը:
Ոսկան ՍԱՐԳՍՅԱՆ
