Երևանի քաղաքապետարանի աշխատակազմի սոցիալական վարչության պետ Ռուզաննա Զաքարյանը այսօր հրավիրված ասուլիսում բարոյականության եւ սիրիահայերի հանդեպ հոգածության կոչ արեց: Տիկին Զաքարյանը փաստեց, որ քիչ չեն դեպքերը, երբ ոմանք իրենց բնակարանները հայաստանցիներին վարձով են տալիս 80000 դրամով, իսկ սիրիահայերին՝ 200000-ով: Նույն «չափանիշներով» էլ գործում են տաքսու վարորդները, չնայած, նրա խոսքով, եղել է վարորդ, որ անգամ անվճար է տեղափոխել սիրիահային:
Ռուզաննա Զաքարյանը նշեց, որ սիրիահայ մեր հայրենակիցները ամենից շատ կենտրոնացած են Կենտրոնում՝ 191 ընտանիք եւ Արաբկիրում՝ 131, չնայած, անկախ բնակության վայրից, բոլորն էլ քաղաքապետարանի ուշադրության ներքո են: Նրա ասելով, քաղաքապետարանը սփյուռքի նախարարությունից վերցրել է սիրիահայ ընտանիքների ցուցակները եւ գնացել յուրաքանչյուր հասցեի հետեւից:
Այս տարվա հունվարի դրությամբ Հայաստանում կա շուրջ 500 սիրիահայ ընտանիք՝ 1400 անդամներով: Երեւանի քաղաքապետարանը դրամական աջակցություն է ցուցաբերել 156 ընտանիքի, կենցաղային իրերով ապահովել 128-ի, 67 ընտանիք ստացել է պարենային աջակցություն: «Սիրիահայերի թվում կան նաեւ միայնակ տարեցներ, այդպիսի 16 քաղաքացիների կցել ենք «Գթության խոհանոցների»,-հայտնեց տիկին Զաքարյանը:
Նա նաեւ հայտնեց, որ 65 տարին լրացած ցանկացած սիրիահայ կարող է դիմել եւ ստանալ կենսաթոշակ, ինչպես ՀՀ մնացած քաղաքացիները:
Գոհար ՀԱԿՈԲՅԱՆ
