«Նախկինում էլ իմ դեմ գրել են, թե իբր ես նախարար ժամանակ ասել եմ՝ ֆաքսին սուրճ հյուրասիրեք ընդունարանում։ Հարց եմ տալիս ձեզ, նախարարը եթե մեկին հարգում է, սուրճ է ուզում հյուրասիրի, ընդունարանո՞ւմ է հյուրասիրում», դժգոհել է հանրապետական պատգամավոր, բնապահպանության նախկին նախարար Մուրադ Մուրադյանը։
«ՉԻ» – Փաստորեն Մուրադ Մուրադյանին թվացել է, թե այդ պատմության ամենատարօրինակ պահն այն է, որ ինքը ֆաքսին սուրճ է հյուրասիրել ոչ թե իր աշխատասենյակում, այլ ընդունարանում։ Իսկ պատմությունն այսպես է եղել՝ քարտուղարուհին մտել է ու զեկուցել, որ ֆաքսը եկել է, պրն Մուրադյանն էլ ասել է «սուրճ հյուրասիրի, մինչեւ վերջացնեմ»։ Դեռ լավ է, որ քարտուղարուհին չի ասել, որ դա շատ կարևոր ֆաքս է, թե չէ քյաբաբ-բան էլ կհյուրասիրեին։
Իսկ րնդհանրապես՝ պրն Մուրադյանն իզուր է նեղանում, որ իր անվան հետ կապված նման պատմություններ են շրջանառվում։ Հակառակը՝ Հայաստանի վիճակն այնպիսին է, որ նման պատմությունները միայն մեծացնում են նրա՝ բարձր պաշտոններ զբաղեցնելու շանսերը։
«Չորրորդ ինքնիշխանություն»
