«Ես կարծում եմ՝ քաղաքացիների համար էլ է տարակուսելի ու տարօրինակ, որ նախագահական ընտրությունների ժամանակ կողմնորոշում չհայտնած և լռակյաց դիրքորոշում ընտրած քաղաքական ուժը հիմա ուզում է քաղաքական հայտ ներկայացնի: Չեմ կարծում, որ սա միայն վարչապետի դեմ է, պարզապես իրենց նախապատրաստած քայլերն են Երևանի ավագանու ընտրությունների համար»,-այսօր այս մասին ԱԺ-ում լրագրողների հետ զրույցում ասել է ՀՀԿ մամուլի խոսնակ Էդուարդ Շարմազանովը՝ պատասխանելով հարցին, թե ինչո՞ւ են ԲՀԿ-ի կողմից վերջին օրերին ակտիվացել «հարձակումները» վարչապետ Տիգրան Սարգսյանի ուղղությամբ:
Շարմազանովի համար տարակուսելի է, որ խաղից դուրս կամ «օֆ սայդ» հայտնված քաղաքական ուժն այսօր բարձրաձայն պահանջներ է ներկայացնում:
Ինչ վերաբերում է ԲՀԿ խմբակցության քարտուղար Նաիրա Զոհրաբյանի այսօր հնչեցրած տեսակետին, թե սահմանադրական փոփոխություններով կարելի է վարչապետի պաշտոնը անվանական կցել Տիգրան Սարգսյանին ու նրան հռչակել ցմահ վարչապետ, Շարմազանովը չցանկացավ մեկնաբանել սա՝ նկատելով. «Կանանց չեմ մեկնաբանում սկզբունքորեն, բայց պետք է մնան չափի մեջ»:
