Ադրբեջանում հարցվածների կեսից քիչն են ասել, որ կարող են ասել այն, ինչ մտածում են:
Հետազոտական ռեսուրսների կովկասյան կենտրոններ (ՀՌԿԿ) ծրագրի շրջանակներում մեր երկրի քաղաքացիների շրջանում սոցհարցում է կատարվել: Ծրագրի մասնագետները քաղաքային եւ գյուղական բնակավայրերի տնային տնտեսություններին սոցիալական, քաղաքական եւ տնտեսական զարգացումների վերաբերյալ հարցեր են ուղղել: Հարցերը եղել են Ստալինի, Հայոց ցեղասպանության, կառավարության, ներքաղաքական իրավիճակի եւ այլնի մասին: Այսօր «Կոնգրես» հյուրանոցի «Պիկասո» սրահում Կովկասյան բարոմետր ծրագրի շրջանակներում տեղի ունեցավ 2012թ. հետազոտության արդյունքների ներկայացումը: Հանրային կարծիքի ուսումնասիրության արդյունքները ներկայացրեց ՀՌԿԿ Հայաստանյան գրասենյակի տնօրեն Հեղինե Մանասյանը:
Այն հարցին, թե որքանո՞վ եք համամիտ, որ երկրի կառավարությունը ձեզ նման մարդկանց արդարացիորեն է վերաբերվում, լիովին համամիտ են Հայաստանում հարցվածների 20 %-ը, համամիտ չեն 71%-ը, ինչն, ըստ ՀՌԿԿ Հայաստանի տնօրեն Հեղինե Մանասյանի, բավականին բարձր ցուցանիշ է: Հարցվածների 70 %-ը, ասել է, որ կարող է ասել այն, ինչ մտածում է:
Ըստ ծրագրի տնօրենի, առավել կաշկանդված են Ադրբեջանում, այնտեղ հարցվածներից կեսից քիչն են ասել, որ կարող են ասել այն, ինչ մտածում են:
Ըստ բանախոսի, արժանահավատ տվյալների միաժամանակյա հավաքագրումը Հայաստանի, Վրաստանի եւ Ադրբեջանի տնային տնտեսություններում իրականացվում է 2004 թ-ից ի վեր եւ հնարավորություն է ընձեռում իրականացնելու միջերկրային համեմատություններ՝ բացահայտելով տարածաշրջանի երկրներում դիտարկվող միտումները:
ՀՀ կառավարության աշխատակազմի սոցիալական վարչության պետի պաշտոնակատար Աստղիկ Միրզախանյանի խոսքերով էլ, այդպիսի հետազոտություններով մենք կտեղեկանանք, թե ինչով ենք հետ մնում մեր հարեւաններից եւ ինչով ենք գերազանցում:
Կարդացեք նաև
Սուսաննա ՕՀԱՆՅԱՆ
