Այսօր Aravot.am-ը «Ժառանգության» մամուլի խոսնակ Հովսեփ Խուրշուդյանից Ազատության հրապարակում հրավիրած ասուլիսում հետաքրքրվեց՝ եթե «Ժառանգությունը» չունի բավարար թվով մարդիկ, որոնք կարող են իրենց թիկունքով պաշտպանել քվեները բոլոր ընտրատեղամասերում, ապա ինչքան էլ «ստերիլ, ազատ եւ արդար» լինեն ավագանու ընտրությունները, նույն գնահատականները չե՞ն հնչելու նաեւ այդ ընտրություններին՝ ինչպես կանխատեսել էր Սերժ Սարգսյանը լրագրողների հետ հանդիպման ընթացքում: Հովսեփ Խուրշուդյանը պատասխանեց. «Դա այն զավեշտալի արտահայտություններից մեկն էր, որը հաստատ սազական չէր որեւէ երկրի գործող ղեկավարին: Այսինքն, նա ընդունում է, որ ամբողջ պատասխանատվությունը ընդդիմության վրա է, ընտրությունների օրինականությունն ապահովելը «Ժառանգության» ներկայացուցիչների վրա էր, իսկ իշխանության իրավունքն էր դա կեղծել եւ կրիմինալի վրա հենված նաեւ սպառնալիքներ տեղալ, լցոնումներ իրականացնել: Այսինքն նա ընդունում է, որ այս երկրում միակ ուժը, որ Սահմանադրության համար պայքարում է եւ պահում է Սահմանադրությունը, դա տվյալ դեպքում ընդդիմությունն է եւ Րաֆֆի Հովհաննիսյանը: Ուրեմն նա այդ խոսքերով արդեն ինքնաբացարկ է հայտնում: Ես չգիտեմ, սա նույնիսկ աննախադեպ հայտարարություն էր նույնիսկ մեր երկրի պատմության մեջ»:
Հռիփսիմե ՋԵԲԵՋՅԱՆ
