«Ժառանգությունը» պատասխանում է Սերժ Սարգսյանի այն բացատրությանը, որ Շիրակում պարտվել է, քանի որ չի ունեցել կուսակցական կառույցներ
Այսօր Ազատության հրապարակում բացօթյա ասուլիսում Aravot.am-ը «Ժառանգություն» կուսակցության մամուլի խոսնակ Հովսեփ Խուրշուդյանին հարցրեց, թե «Ժառանգությունը» Շիրակի մարզում քանի՞ կուսակցական կառույց ունի, որ Րաֆֆի Հովհաննիսյանն այնտեղ հաղթել է: Հիշեցնենք, որ նախօրեին հրավիրած ասուլիսում Սերժ Սարգսյանը Շիրակի մարզում իր պարտությունը բացատրել էր կուսակցական կառույցների բացակայությամբ Շիրակի մարզում:
Հովսեփ Խուրշուդյանը պատասխանեց. «Լավ կլիներ, որ պարոն Սարգսյանը ոչ միայն Շիրակի մարզի, այլեւ բոլոր խոշոր քաղաքներում իր պարտությունը բացատրեր, որովհետեւ մենք գիտենք, թե ինչքան մարզային կառույցներ ունի ՀՀԿ-ն եւ գիտենք, թե ինչքան անհավասար պայքար էր ընթանում: Մենք ամբողջ Շիրակի մարզում ունենք մեկ գրասենյակ եւ մի քանի ստորաբաժանումներ Գյումրիում, Արթիկում եւ մեկ-երկու փոքր ստորաբաժանում Ախուրյանում եւ Մարալիկում: Համեմատելով ՀՀԿ-ի նաեւ ծախսերի եւ լայնածավալ շտաբային գործունեության հետ, որը մենք պահանջեցինք, որ մտցվի ընտրական ծախսերի մեջ, ապա դուք կտեսնեք, որ իրոք դա անհիմն մեկնաբանություն է: Ես կարծում եմ, որ ամեն ինչ արվել է այս ընթացքում իշխող կուսակցության կողմից որեւէ իրական կուսակցաքաղաքական ինստիտուտների ձեւավորմանը եւ զարգացմանը խոչընդոտելու համար: Իրենց համար հիմնական հենասյունը ոչ թե քաղաքական ինստիտուտներն են աշխատում, մենք լավ տեսանք, թե ովքեր էին հիմնականում աշխատում ընտրակաշառքները բաժանելուց, ընտրակեղծիքները կազմակերպելուց: Նրանք չէին կարող լինել քաղաքական մարմիններ ու ինստիտուտներ: Դրանք ավելի շատ քրեածին էլեմենտների հետ սերտ համագործակցությամբ արեց ՀՀԿ-ն»:
Հռիփսիմե ՋԵԲԵՋՅԱՆ
Կարդացեք նաև
