ԱԻՄ նախագահ Պարույր Հայրիկյանի փաստաբան Լեւոն Բաղդասարյանն այսօր վստահեցրեց, որ պարոն Հայրիկյանը չի պնդել, թե իր դեմ ուղղված մահափորձի պատվիրատուն ռուսական ուժերն են:
«Իմ եղած տեղեկատվությամբ, պարոն Հայրկյանը նման բան չի պնդել, բայց տարբերակների թվում եղել են որոշակի ուժեր, որոնց նպատակն էր խարխլել, ըստ պարոն Հայրիկյանի, երկրի անվտանգությունը եւ ֆիզիկապես հաշվեհարդար տեսնել վերջինիս նկատմամբ»,- «Պոստ սկրիպտում» ակումբում ասաց փաստաբանը:
Չնայած, ինչպես արդեն տեղեկացրել ենք, փաստաբանն այսօր ասուլիսի սկզբում ներկայացրաեց հայտարարություն, թե գործով կալանավորված անձինք ընդամենը հանցագործության փոքրագույն մասնիկն են ու պահանջում են ողջամիտ ժամանակահատվածում բացահայտել իրական պատվիրատուին, միաժամանակ ասաց, որ նախաքննական մարմնին վստահում են. «Չենք կասկածում նրա պրոֆեսիոնալիզմին»:
Պարոն Բաղդասարյանի խոսքերով, իրական պատվիրատուները դեռ կալանավորված չեն. «Հայրիկյանը կալանավորված անձանց չի ճանաչել…այո, մենք կարծում ենք, որ ցանկանում էին վերացնել քաղաքական գործչին, որի հիմքով էլ ցանկանում ենք, որ տեղի ունենա օբյեկտիվ նախաքննություն»:
Կարդացեք նաև
Հարցին, թե նախաքննությունը օբյեկտիվ չի՞ ընթանում, ասաց` ես նման բան չասացի:
Արփինե ՍԻՄՈՆՅԱՆ
