Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանը այսօր երկու անգամ կարճատեւ ժամանակ տրամադրեց Հայաստանի քաղաքագետների միության նախագահ Հմայակ Հովհաննիսյանի պաշտպան Գեորգի Գուլքանյանին, որպեսզի նա իր միջնորդություններն անի: Պաշտպանը հղումներ էր անում այս կամ այն ապացույցին, բայց երբ գալիս էր ապացույցը ներկայացնելու պահը, որպեսզի հետազոտվի, այն տպավորությունն էր, որ չէր գտնում ապացույցը եւ չէր կարողանում ներկայացնել, թե ինչ է ցանկանում: Այդպես եղավ, երբ պաշտպանը միջնորդեց, որպեսզի դատարանը հետազոտի ոստիկանության Կենտրոնի բաժնի ամփոփագիրը: Չնայած մեղադրող Վ. Մուրադյանը առարկեց այդ միջնորդությանը, ասելով, թե ոստիկանության ամփոփագիրը չի կարող դիտվել որպես ապացույց, սակայն դատարանը բավարարեց Հմայակ Հովհաննիսյանի պաշտպանի միջնորդությունը: Հետազոտման ժամանակ պաշտպանը չէր գտնում ամփոփագիրը, որպեսզի արտահայտեր իր դիրքորոշումը:
Դատարանը արձանագրեց, որ պաշտպանը թեեւ ունի միջնորդություններ, սակայն պատրաստ չէ այն ներկայացնելու, ուստի որոշվեց ժամանակ տրամադրել, որպեսզի պատրաստվեն: Դատական նիստը նշանակվեց ապրիլի 4-ին:
Հիշեցնենք, որ այսօր Հայաստանի Քաղաքագետների միության նախագահ Հմայակ Հովհաննիսյանը պետք է ցուցմունք տար իր դեմ հարուցված քրեակա գործով: Նա մեղադրվում է «Հայհիդրոէներգոնախագիծ» ՓԲ ընկերության նախագահ Սենիկ Ջուլհակյանին միջին ծանրության մարմնական վնասվածք հասցնելու համար:
Ռուզան ՄԻՆԱՍՅԱՆ
