Բաց քաղաքացիական խորհրդի հերթական նիստը՝ Ազատության հրապարակում
Այսօր Ազատության հրապարակում բաց քաղաքացիական խորհրդի նիստի զեկուցողներից էր ԱԺ նախկին փոխնախագահ Կարապետ Ռուբինյանը: Նա, խոսելով խորհրդարանական կառավարման համակարգի եւ կուսակցությունների մասին, ասաց, որ Սերժ Սարգսյանին պետք են կուսակցությունների փոխարեն փողի տոպրակներ, որոնք կգնան տարբեր պայմանավորվածությունների, բազարների. «Արդյունքում մենք տեսնում ենք, որ հիմնականում հենց այդպիսի կուսակցություններ են եւ հենց այդպիսի գործունեություն ենք տեսնում մեր խորհրդարանում: Առաջին բժիշկը նորմալ ընտրական համակարգն է, որը կբերի կուսակցությունների խոշորացման եւ արդյունավետության բարձրացման: Այն կուսակցությունները, որոնք միայն գողական բազարների համար են, ավտոմատ դուրս կգան, կվերանան»:
Ըստ Կարապետ Ռուբինյանի՝ կուսակցություններին վերաբերվող օրենսդրությունն էլ պետք է փոխվի, որ կուսակցություններում ոչ թե մեկը փողատեր լինի ու օրենք թելադրի, այլ կորպորատիվ բնույթ կրեն դրանք՝ հավասար անդամավճարի միջոցով ձեւավորվեն բյուջեները. «Դուք պատկերացնո՞ւմ եք հիմա ԲՀԿ-ի մեջ մեկը որոշի մրցակցել Ծառուկյանի հետ: Դա ուղղակի ֆանտաստիկայի ոլորտից է»:
Կարդացեք նաև
Կարապետ Ռուբինյանը նաեւ ասաց, որ այլ ելք չկա, պետք է ամեն կերպ այս իշխանությանը հասկացնել, որ ժողովուրդն այլեւս չի ուզում իրենց հանդուրժել. «Էդ մարդը երեկ էլ ասեց, որ եթե 0,1%-ն ա, ինչի՞ պիտի բանի տեղ դնի: Դուրս ա գալիս, որ ինչ-որ թվի պետք է բանի տեղ դնի: Եթե այդպես է, թող հայտարարի էդ թիվը, մենք էլ իմանանք ինչ թիվ ա, բերենք էդ թիվը կանգնացնենք, բայց՝ պայմանով, որ էդ դեպքում պիտի գնաս: Եթե ինքը այդպիսի թիվ հայտարարի, ես համոզված եմ, կընկնենք գյուղեգյուղ, քաղաքեքաղաք, կբերենք էդ թիվը: Էդ ամենահեշտ խնդիրը կլինի: Շուշան Պետրոսյանն էր ասում՝ որ Սերժ Սարգսյանը էս երկրի գերագույն հրամանատարը չլինի, էս երկրի վիճակը ո՞նց կլինի: Ոնց որ նա ցարի բոգն ա»:
Րաֆֆի Հովհաննիսյանը Կարապետ Ռուբինյանին ուղղեց՝ ասելով, որ իրենք ինչ-որ թվով մարդիկ չեն բերի, նրանք իրենց կամքով կգան:
Հռիփսիմե ՋԵԲԵՋՅԱՆ
