Այսօր Շիրակի մարզի ընդհանուր իրավասության դատարանում շարունակվեց իր նշանադրության օրը դաժանաբար սպանված 27-ամյա Կարեն Եսայանի գործի քննությունը:
Դատարանն այսօր լսեց ընդամենը մեկ վկայի, ընդ որում` սպանության գործին չառնչվող: Հիշեցնենք, որ Անի նախկին ոստիկանապետի որդին` Հարություն Սարգսյանը, սպանությունից բացի մեղադրվում է նաև ապօրինի ձեռնարկատիրական գործունեություն ծավալելու, արտասահմանից մեքենաներ ներկրելու և Հայաստանում իրացնելու մեջ, և այս երկու քրեական գործերը քննվում են համատեղ:
Այսօր որպես վկա հրավիրվել էր Գյումրու թիվ 2 պոլիկլինիկայում աշխատող բժիշկ-սեքսապաթոլոգ Սերգեյ Գինեցյանը, ով ընդամենը Հարություն Սարգսյանից գնել էր բալագույն «Մերսեդես» մակնիշի մեքենա: Վկան, չգիտես ինչու, փորձում էր թաքցնել , որ մեքենայի համարանիշները գերմանական են եղել, խնդրում էր հիմք ընդունել դատարանում տված իր ցուցմունքը, այլ ոչ թե նախաքննականը, որն էլ հունից հանեց դատախազներին : «Նախաքննական ցուցմունքի մեջ ասում եք, որ մեքենան Գերմանիայից է ներկրված, հիմա ասում եք՝ չեք հիշում, թե որտեղից էր բերված, էս հիշողությա՞մբ եք բուժում հիվանդներին» , -նեղվեց դատախազը: Այնուհետ վկային դիտղություն արեցին, որ այս պահվածքը վերաբերմունք չէ դատարանի, արդարադատության նկատմամբ:
Կարեն Եսայանի մոր` Անահիտ Իսկանդարյանի լիազոր ներկայացուցիչն էլ ենթադրեց, որ վկան եկել է թատրոնի բեմադրման, քանի որ սկզբիցևեթ հայտարարեց, թե ճշգրտումներ ունի մտցնելու, և ի՞նչը պիտի ճշգրտի, եթե չի հիշում նախաքննական ցուցմունքը: Հարություն Սարգսյանի փաստաբանը դատարանին հորդորեց դադարեցնել բարոյախրատական ճառեր կարդալը բժիշկ մարդու գլխին և իրավական գնահատական տալ նրա պահվածքին: Մյուս վկաները դատարան չէին ներկայացել, ամբաստանյալի շահերի պաշտպանը միջնորդեց բերման ենթարկել նրանց:
Կարդացեք նաև
Դատը նշանակվեց մարտի 26-ին և 27-ին: Երկու օր շարունակ դատական նիստ նշանակելու իմաստն այն է, որ ամբաստանյալին բերում են Երևանից, նա մի օր կմնա Ախուրյանի հատուկ պահպանման խցում, մյուս օրը ևս կմասնակցի դատավարությանը և նորից կտեղափոխեն կալանավայր: Այսինքն այս ձևով նա ավելի էժան կնստի պետության վրա:
Նունե ԱՐԵՎՇԱՏՅԱՆ
