«Իսկապես, մենք մտածում էինք, որ Երեւանի ավագանու ընտրությունները կարող են այն հարթակը դառնալ, որն ընդդիմադիր ուժերին միավորվելու, այդ ընտրություններում քաղաքական պայքարի ճանապարհով գնալու հնարավորություն կտար եւ ՀՅԴ-ն դրա համար արել է ամեն հնարավորն ու անհնարը»,- այսօր լրագրողների հետ զրույցում նշեց ՀՅԴ խմբակցության պատգամավոր Աղվան Վարդանյանը`պատասխանելով հարցին`ինչո՞ւ այդպես էլ չկայացավ ընդդիմադիր ուժերի համախմբում, ինչի շուրջ բանակցություններ էին սկսվել, ովքե՞ր էին մեղավորները: Դաշնակցական պատգամավորի խոսքով՝ քննարկումներ են տեղի ունեցել «Ժառանգության» եւ ԲՀԿ-ի հետ, թե միասին, թե առանձին-առանձին, սակայն մոտեցումների տարբերությունները թույլ չտվեցին միավորվել եւ միասնական ցուցակ կազմել:
«Դաշնակցության խիղճը մաքուր է, քանի որ մենք արեցինք ամեն ինչ, որպեսզի քաղաքական ուժերը համաձայնության գան: Յուրաքանչյուր քաղաքական ուժ առանձին կմասնակցի այդ ընտրություններին, սակայն դա չի նշանակում, որ համագործակցությունը կդադարեցվի: Արդեն Երեւանի ավագանու ընտրություններից հետո, հնարավոր է, բարենպաստ պայմաններ ստեղծվեն համատեղ աշխատանքի համար»,-ընդգծեց Վարդանյանը:
Նելլի ԳՐԻԳՈՐՅԱՆ
