«Ստվերային կառավարությունը գիտաֆանտաստիկ ժանրից է»,-այսպիսի կարծիք հայտնեց այսօր «Հայացք» ակումբում քաղաքագետ Երվանդ Բոզոյանը` պատասխանելով Aravot.am-ի հարցին, թե ի՞նչ կտա բաց քաղաքացիական խորհուրդը` ստվերային կառավարությունը, որը ձեւավորվել է Ազատության հրապարակում: Քաղաքագետի դիտարկմամբ` «Անկեղծ ասած` ես ստվերային կառավարության գաղափարը լավ չեմ պատկերացնում`ինչ է նշանակում: Մեծ հաշվով այն պրոցեսները, որ տեղի են ունենում Հայաստանում, այլ հարթության վրա են: Մինչդեռ ստվերային կաբինետի պրակտիկա կա Մեծ Բրիտանիայում, երբ ընդդիմադիր կուսակցությունը կազմել է ստվերային կաբինետ, որի անդամները պառլամենտում բարձրացնում են գերատեսչական հարցեր, եւ այս պրոցեսն ընթանում է իշխող եւ օպոզիցիոն կուսակցությունների միջեւ: Այսօր ոնց որ թե Հայաստանում այդպես չէ, իրավիճակն այլ է, ստվերային կաբինետ ստեղծել փողոցում, ես չեմ պատկերացնում»:
Մեր այն հարցին էլ, որ բրիտանական տարբերակը Հայաստանում չի՞ աշխատի, պարոն Բոզոյանն ասաց, որ չի աշխատի, քանի որ, ըստ էության պառլամենտը մեզ մոտ կայացած չէ. «Մեծ Բրիտանիայում դա տրադիցիոն է, մի քանի հարյուր տարվա պատմություն ունի, այլ երկրներում նման տրադիցիա չի աշխատում»:
Ասուլիսի մեկ այլ մասնակից Գլոբալիզացիայի եւ տարածաշրջանային համագործակցության վերլուծական կենտրոնի ղեկավար Ստեփան Գրիգորյանն էլ կարծիք հայտնեց, որ այդ բաները մեզ մոտ էլ կարելի է փորձարկել եւ ստվերային կառավարություն ստեղծելու գաղափարը ողջունելի է. «Ի՞նչ եղավ` Նիկոլ Փաշինյանի գաղափարն է, որքան հասկանում եմ` Րաֆֆի Հովհաննիսյանինը չէ, իմանանք իրենց մտքներում ի՞նչ կա, ում են առաջ քաշում: Դրա մեջ վատ բան չկա, ու ես չէի նույնացնի ստվերային կաբինետի հետ: Գաղափարն այն է, որ պետք է ասել թե` ում հետ ես գալիս իշխանության, եթե գաս` ում հետ կաշխատես, վատ չէ: Միայն տեխնիկական խնդիր կա, Նիկոլ Փաշինյանը ցուցակ հրապարակեց` լիքը մարդ կա, հետո պարզվեց իրենց հետ չեն խոսել, ու հիմա ինչ-որ շղթա գնաց` մի խումբ մարդիկ ասացին, որ մենք չենք ուզում ձեզ հետ աշխատել, դա, ընդհանուր առմամբ, հարվածում է պրոցեսին: Եթե ցուցակ ես հրապարակում, անպայման իրենց հետ պետք է խոսես»:
Պարոն Գրիգորյանը ստվերային կառավարությունը նույնացրեց զուգահեռ պետական ինստիտուտների, զուգահեռ կառավարության ստեղծման հետ, որը կոչվում է ուղղակի դեմոկրատիա, ոչ թե ներկայացուցչական, իսկ այդ ուղղակի դեմոկրատիան մոտ 2000 տարվա պատմություն ունի, եւ ըստ պարոն Գրիգորյանի, պատմությունը գալիս է հին Հռոմից. 10 հազար մարդ հավաքվում էր, քննարկում էր ու քվեարկում էր:
Կարդացեք նաև
Պարոն Բոզոյանն էլ նկատեց, որ աշխարհը զարգացում է ապրում, եւ եթե մենք վերադառնանք հին ժամանակներ, ճիշտ չի լինի. «Մեր ներկայացուցչական դեմոկրատիան ճիշտ չի աշխատում, էլ ուր մնաց` ուղիղ դեմոկրատիան: Ամբոխի մոտ մարդիկ ասեն` դուք կո՞ղմ եք, թե` դեմ, կամ ամբոխը որոշի, ասենք` ո՞վ պետք է լինի նախարար, մենք մի քիչ վայրիանում ենք»:
Իսկ Ստեփան Գրիգորյանի դիտարկմամբ էլ`ավելի ճիշտ է ուղղակիորեն մարդկանց հետ հանդիպել, քան այդ օրենքները մեզ համար գրեն օլիգարխները. «Այսօր պառլամենտ չունենք, չի աշխատում, լավ, Արմեն Ռուստամյանի խոսքերով ասեմ `լավագույն դեպքում 28 պատգամավոր ունենք, մյուս մասը` օլիգարխ են: Հիմա դուք ի՞նչ եք ասում` օլիգարխները իբր ներկայացնում են ժողովրդին, իրե՞նք թելադրեն խաղի կանոնները, թե հրապարակում թելադրեն»:
Նելլի ԲԱԲԱՅԱՆ
Ի՞ նչ տարբերություն «ամբոխը» կորոշի անձամբ,թե՞
ԻՐ ներկայացուցիչների միջոցով: Ստվերային կառավարությունը ԼՈՒՐՋ քաղաքական գործիք է,նույնը` ( քաղ.պահանջներով) հացադուլը: Նախանցյալ տարի , պառլ. ընտրություններից հետո,Հոլանդիայում էլ ստեղծվեց Ստվերային կառավարություն ,որը տարավ նոր պառլ. ընտրությունների: