Ալերգոլոգ Աստղիկ Բաղդասարյանը «Արմատ» մամուլի ակումբի այսօրվա ասուլիսի ժամանակ խոսեց գարնանային ալերգիաներից, եւ թե ինչպես զերծ մնալ ալերգիաներից:
Հայաստանում գնալով ավելի մեծ տարածում են գտնում շնչառական ալերգիաները: Նման աճ զարգացող երկրներում դիտվում էր դեռևս տասնամյակներ առաջ: Սակայն վերջին հետազոտությունները ցույց են տվել, որ զարգացող երկրներում շնչառական ալերգիաների աճման տեմպերը դանդաղել են և փոխարենը շատացել են սուր եղնջացաները, սննդային ալերգիաները: Սակայն Հայաստանում դեռևս այդպես չէ:
«Խնդիրը չի փոխվում: Գարնանը հիմնականում սրվում են շնչառական ալերգիաները, քանի որ սկսում են ծաղկել ծառերը, ծաղկեփոշիներով պայմանավորված, այդ ալերգիաները սրվում են: 2-րդ խնդիրը, որ կարող է սրվել գարնան ամիսներին արևի առկայությունն է, որը առաջացնում է մաշկային խնդիրներ որոշ մարդկանց մոտ, մյուս կողմից կարող են գլուխ բարձրացնել միջատների կողմից հարուցվող խնդիրները: Օրինակ այն մարդիկ, ովքեր ունեն տարբեր միջատների թույնի նկատմամբ ալերգիա, նրանց մոտ մեծանում է հավանականությունը խայթոցների ենթարկվելու»,- ասաց ալերգոլոգ Աստղիկ Բաղդասարյանը:
Տվյալ ալերգիաների առկայության պայմաններում խորհուրդ է տրվում մինչև ալերգիայի սեզոնի սկսվելը այցելել բժշկի, որպեսզի պարզվեն ալերգիայի պատճառները և համապատասխան քայլեր ձեռնարկվեն կանխելու համար:
Կարդացեք նաև
Արևային ալերգիա ունեցող մարդկանց Աստղիկ Բաղդասարյանը խորհուրդ տվեց օգտագործել պաշտպանիչ քսուքներ և անընդհատ պահպանել մաշկի խոնավությունը:
«Հայաստանում ռիսկային սեզոն շնչառական ալերգիաների համար կարելի է համարել ապրիլից սեպտեմբեր ամիսները: Ոչ բոլոր ալերգիաները, բայց կան այնպիսիք, որոնք ունեն վերջնական բուժում: Պետք է անցնել բուժում, դրանք կարող են լինել դեղահաբեր կամ ենթամաշկային ներարկումներ, ենթալեզվային կաթիլներ: Պարզապես բուժման տևողությունն է մի քիչ բարդ, որովհետև տևում է 3-5 տարի և կանոնավոր դեղորայքի օգտագործում է պահանջում: Բացի այդ, ալերգիաները ունեն ինքնուրույն լավանալու հակում հատկապես երեխաների շրջանում»,- ասաց Աստղիկ Բաղդասարյանը:
Մարիամ ՄԿՐՏՉՅԱՆ
