«Պոլսի հայկական պատրիարքարանի կողմից կազմված պաշտոնական տվյալների համաձայն` Օսմանյան կայսրությունում հայկական հուշարձանների թիվը անցնում էր 2000-ը: Այդ թվում էին 4-5 դդ. վաղ քրիստոնեական հուշարձաններ, որոնք ավերվել են ցեղասպանության ժամանակ: ՅՈՒՆԵՍԿՕ-ի տվյալներով` 464 հուշարձան էլ անհետացել է»,-այսօր «Զարկերակ» ակումբում ասաց ՀՀ ԱԺ պատգամավոր, Արևմտահայոց ազգային համագումար հ/կ-ի խորհրդի անդամ, Հայաստանյան գրասենյակի համանախագահ Արագած Ախոյանը:
«Թուրքիայի ցինիկ վարչակազմը, ցանկանալով վերացնել հայկական ինքնությունը, մեր պատմամշակութային արժեքները վերածեց մզկիթների եւ ախոռների կամ քանդեց»,-հավելեց նա: Պարոն Ախոյանը նշեց, որ վերջին տասնամյակում վերանորոգվեց Աղթամարի եկեղեցին, Դիարբեքիրի սուրբ Կիրակոսը, որը հայությանն է պատկանում:
Աղթամարի վերականգնման շուրջ ԻԿՕՄՕՍ-Հայաստանի նախագահ Գագիկ Գյուրջյանն ասաց, որ ԻԿՕՄՕՍ-Հայաստանը Թուրքիայի մշակույթի նախարարության հետ այդ ուղղությամբ աշխատեց դեռեւս 2003թ.-ից. «իսկ 2005-ին ավարտվեց նախագիծը, համաձայն որի` 2,5 միլիոն եվրոյի դրամի ներդրում կատարվեց»:
Գյուրջյանը հայտնեց, որ ներկայումս աշխատանքներ են տարվում Աննի սուրբ Ամենափրկիչ եկեղեցու եւ Մայր տաճարի վերականգնման հարցում. «Պատվիրատուն Թուրքիայի մշակույթի նախարարությունն է, իսկ մնացած գումարը Հուշարձանների համաշխարհային ֆոնդն է տալիս: Վերջինիս դիմել էինք երկու տարի առաջ` հայ մասնագետների ներկայությունն ապահովելու խնդրանքով: Դիմեցինք նաեւ ԻԿՕՄՕՍ-ի գլխավոր ասամբլեային, որը տեղի ունեցավ 2011թ.-ին` Փարիզում: Ներկայացրեցինք բանաձեւ, որով պնդում էինք, որ վերականգնման ընթացքում լինի միջազգային փորձագետների խումբ, որում ընդգրկված կլինեն նաեւ հայ մասնագետներ: Նախորդ տարի Թուրքիայի մշակույթի նախարարությունն առաջարկին դրական պատասխան տվեց: Կարծում եմ` այս տարի արդեն կներկայացնենք մեր մասնագետներին, արդեն ունենք թեկնածու»:
Կարդացեք նաև
Գյուրջյանի խոսքով. «Վերականգնման աշխատանքները լավ են ընթանում` մասնագիտական բարձր մակարդակի վրա»:
Ինչ վերաբերում է Երևան-Վան չվերթին, Արագած Ախոյանի խոսքով` այն կնպաստի գործարար կապերի ընդլայնմանը, իսկ պարոն Գյուրջյանի կարծիքով` այն ավելի շատ կոմերցիոն նպատակների կծառայի:
Լուիզա ՍՈՒՔԻԱՍՅԱՆ
