Թբիլիսիում վաղը մեկնարկող ազատ ըմբշամարտի Եվրոպայի առաջնության ավարտից հետո մրցագորգը տրամադրվելու է հունահռոմեական ոճայիններին:
Հայաստանի ազգային հավաքականի գլխավոր մարզիչ Լեւոն Ջուլֆալակյանն այսօր Aravot.am-ի հետ զրույցում ասաց. «Եվրոպայի առաջնություն մեկնում ենք մարտի 21-ին: Հավաքականը համալրված է ամբողջական կազմով: Թբիլիսիում մրցագորգ մտնելու են Հարություն Հովհաննիսյանը` 55 կգ քաշային կարգ, Ալեքսան Միքայելյանը` 60, Սասուն Ղամբարյանը` 66, Ռաֆիկ Մանուկյանը` 74, Արթուր Շահինյանը` 84, Արթուր Ալեքսանյանը` 96 եւ Վաչիկ Եղիազարյանը` 120: Բոլոր տղաներն էլ տրամադրված են մարտականորեն: Ու նշանակություն չունի, թե ով մինչեւ այս պահը մարզական ինչ ձեռքբերում ունի: Եվրոպայի առաջնությունը հենց այնպես մրցաշար չէ: Այնտեղ հանդես են գալիս շուրջ 50 երկրներ: Եվ մեդալ ակնկալելը, առավել եւս, պահանջելը ինքնանպատակ չէ: Ինձ, որպես հավաքականի գլխավոր մարզչի, իհարկե, մեդալները ցանկալի են, բայց ավելի շատ ինձ հետաքրքրում է այն, թե օլիմպիական այս քառամյա ցիկլում ինչ «հումք» ունենք, որոնց հետ պետք է աշխատենք մինչեւ 2016 թվականի օլիմպիական խաղերը: Իսկ Թբիլիսիում մեդալների մասին, ինչպես միշտ եմ ասել, ամեն բան կորոշի մրցագորգը»:
Աշոտ ՀԱԿՈԲՅԱՆ
