Լոնդոնում անցկացվող շախմատի հավակնորդների մրցաշարին անդրադառնալով՝ «Սովետսկի սպորտ» թերթը գրում է, որ մրցաշարի գլխավոր հովանավոր Մաիր Մամեդովը առաջնության երկրորդ օրը մրցաշարի մասնակիցներին, լրագրողներին և անգլիական ֆուտբոլի լեգենդներին՝ Բոբի Չարլթոնին և Ալեքս Ֆերգյուսոնին հրավիրել էր շքեղ ընթրիքի, սակայն վերջիններս մերժել էին առաջարկը: Իսկ գրոսմայստերներից առաջարկն ընդունել էր ադրբեջանցի Թեյմուր Ռաջաբովը և «Այո, այո Լևոն Արոնյանը: Այդպիսով Արոնյանը նրբորեն ցույց տվեց, որ Հայաստանի և Ադրբեջանի միջև լարված հարաբերությունները միայն քաղաքականություն է», – գրում է հրապարակման հեղինակը՝ ավելացնելով, որ գրոսմայստերները հրաշալի ջազային կատարումներ լսեցին, լոնդոնյան «Բաքու» ռեստորանում համտեսեցին նրբահամ խորտիկներ, մի-մի բաժակ ջուր խմեցին և գնացին պատրաստվելու հաջորդ մրցելույթին:
Հաջորդ՝ երկրորդ մրցելույթում, հենց Արոնյանն ու Ռաջաբովը հաղթեցին իրենց խաղերում, իսկ երրորդ տուրում Արոնյանն ամրապնդեց իր հաջողությունը՝ հաղթելով Իվանչուկին և դառնալով միանձնյա առաջատար: Ահա, թե ինչ է նշանակում մեծահոգությունն ու լավ ջազը. գրում է հրապարակման հեղինակը:
Պատրաստեց Հովհաննես ԻՇԽԱՆՅԱՆԸ
