ՀՀ քրեական գործերով վերաքննիչ դատարանում, դատավոր Սեւակ Համբարձումյանի նախագահությամբ, այսօր լսվեց ՀՀ նախագահի թեկնածու Վարդան Սեդրակյանի պաշտպան, ՀՀ փաստաբանների պալատի անդամ Ալեքսանդր Սիրունյանի (լուսանկարում) վերաքննիչ բողոքը: Պաշտպանը վիճարկում է Կենտրոն եւ Նորք-Մարաշ վարչական շրջանների ընդհանուր իրավասության դատարանի որոշումը՝ կապված էպոսագետ թեկնածուի նկատմամբ 2 ամսով կալանք ընտրելու որոշման հետ: Դատարանը մեկ ժամ լսելով կողմերի բացատրությունները, մերժեց բողոքը:
Նշենք, որ դատարան էին ներկայացել ԱԱԾ քննչական վարչության պետ Մնացական Մարուքյանը եւ վերահսկող դատախազ Հովսեփ Սարգսյանը:
Aravot.am-ին Ալեքսանդր Սիրունյանը (լուսանկարում) հայտնեց, որ բողոքարկման համար պետք է խորհրդակցի իր պաշտպանյալ Վարդան Սեդրակյանի հետ: Նա նաեւ նշեց, որ ընդհանուր իրավասության դատարանում կալանավորման հիմքերը իրենց չէին տրամադրվել, իսկ հիմա ձեռքի տակ գտնվող հիմքերը չեն տալիս երկու կարեւոր հարցերի պատասխան՝ թե ինչու է մարդը կալանավորված, եթե մարդը չի խուսափել եւ թե ինչու է կալանավորվել անձը՝ լինելով ՀՀ նախագահի թեկնածու:
Ռուզան ՄԻՆԱՍՅԱՆ
