Հայաստանի լավագույն շախմատիստ Լեւոն Արոնյանը քիչ առաջ Լոնդոնում ընթացող հավակնորդների մրցաշարում երկրորդ անընդմեջ հաղթանակը տարավ:
Երրորդ տուրում հայ գրոսմայստերը սեւերով խաղում էր մեր ժամանակների ուժեղագույն գրոսմայստերներից մեկի՝ ուկրաինացի Վասիլի Իվանչուկի հետ: Սակայն Լեւոնը նրա առջեւ այնպիսի խնդիրներ դրեց, որ Իվանչուկը ոչ միայն հայտնվեց իր համար շատ բարդ ու աննպաստ դիրքում, այլեւ սպառեց ժամանակը:
Լեւոն Արոնյանը 3 հնարավորից իր անվան դիմաց գրանցեց 2,5 միավոր եւ այս պահի դրությամբ միանձնյա առաջատարն է:
Ավարտվել է նաեւ Վլադիմիր Կրամնիկ-Ալեքսանդր Գրիշչուկ պարտիան, որում կողմերը ոչ-ոքի են արել: Մյուս պարտիաները դեռ շարունակվում են:
Աշոտ ՀԱԿՈԲՅԱՆ
